Иске Шәйморза авылында яшәүче Мөшфикә Камалова 96 яшен билгеләп үтте
2026 елның 7 апрелендә Иске Шәйморза авылында яшәүче, тыл хезмәтчәне, хезмәт ветераны Мөшфикә Миргасыйм кызы Камаловага 96 яшь тулды.
Бу истәлекле көнне Мөшфикә Миргасыйм кызына Чүпрәле муниципаль районы Башкарма комитеты җитәкчесенең инфраструктура үсеше буенча урынбасары Радик Багаутдинов һәм Иске Шәйморза авыл җирлеге башлыгы Илһамия Мөхитова килде. Алар Мөшфикә апаны туган көне белән котладылар, аңа Россия Президенты В.В. Путин исеменнән котлау хаты, район Башлыгы Марат Гафаров исеменнән истәлекле бүләкләр, чәчәкләр тапшырдылар, сәламәтлек, озын һәм бәхетле гомер теләделәр.
Мөшфикә Миргасыйм кызы 1930 елның 7 апрелендә Иске Шәйморза авылында туа. 1941 елда Мөшфикә апаның әтисен фронтка алалар. Мөшфикә апа сөйләвенчә, башта алар әтиләреннән хат алганнар, аннары хатлар килми башлаган. Соңрак аларга фронттан хат җибәргәннәр, анда әтиләренең хәбәрсез югалганлыгы язылган иде. Сугыш беткәннән соң инде дистә еллар узгач, Мөшфикә апаның әтисе Смоленск янындагы сугышларда һәлак булган һәм Смоленск янындагы туганнар каберенә күмелгән икәнлеге ачыкланган, аларны хәтта Смоленскига аның кайда күмелгәнлеген күрергә чакырганнар. Мөшфикә апа, анда баралмаулары һәм әтиләренең кайда күмелгәнен күрә алмаулары турында үкенеп сөйли.
Бөтен гомерен Мөшфикә апа XXII партсъезд исемендәге колхозда эшләүгә багышлаган. Мөшфикә апа үзе искә төшергәнчә, ул озак еллар колхоз бакчасында эшләгән, тәмәке, яшелчә үстергән, эш авыр булган, бөтен эш кулдан булган.
Озак еллар колхозда хисапчы булып эшләгән ире Әнвәрша абый белән 55 ел бергә гомер итәләр. Кызганычка каршы, Әнвәрша абый бүгенге көнгә кадәр яшәмәгән.
Бүген Мөшфикә апа улы, килене белән яши, ул балаларының, оныкларының, оныкчыкларының кайгыртуларын тоеп яши.
Сугыш һәм сугыштан соңгы елларда кичергән авырлыкларга һәм сынауларга карамастан, Мөшфикә Миргасыйм кызының хәтере бик яхшы, ул үткән елларны хәтерли, оптимизм белән тулы.
Мөшфикә апаның бүген 7 оныгы, 7 оныкчыгы бар. Туган көнендә дә балалары, туганнары кайткан. Мөшфикә апа кунакларның барысына да бик шат иде.