Чүпрәле районының Яңа Әлмәле авылында яшәүче Клавдия Мискинага (Мулеевага) 90 яшь тулды
Клавдия Петровнаның авыр тормыш юлы илнең үткәне белән тыгыз бәйләнгән.
Юбилярны район хакимияте вәкиле, Чүпрәле муниципаль районы Башкарма комитетының төзелеш һәм торак-коммуналь хуҗалык бүлеге җитәкчесе Юрий Шуркин, авыл җирлеге башлыгы Роберт Дружков һәм пенсионерларның авыл Советы җитәкчесе Геннадий Карсаков котладылар. Кунаклар Клавдия Петровнага Чүпрәле районы Башлыгы Марат Гафаровның котлау хатын, бүләкләр, чәчәкләр тапшырдылар, сәламәтлек, тыныч картлык һәм бетмәс-төкәнмәс көч теләделәр.
Клавдия Петровна 1936 елның 24 мартында күп балалы гаиләдә туа. Тату гаиләдә 8 бала үсә, әмма аларның сеңлесе Валя, 8 сыйныфны тәмамлагач, машина астына эләгә һәм һәлак була.
— Безнең көннәрдә без дүрт апа — сеңел: Зинаида, Елизавета, Вера, Татьяна һәм мин. Ә әти — әниләр нигез салган йортта Николай абый һәм килене Галина яши, - дип сөйли юбиляр.
Клавдия Петровнаның авыр тормыш юлы илнең үткәне белән тыгыз бәйләнгән. Сугыш башланганда кызга нибары 6 яшь була, аңа сугыш авырлыкларын, ачлык һәм салкыннарны кичерергә туры килә. 10-11 яшьтә өлкәннәр белән бергә колхозда, кырда эшли. Кием-салым булмау сәбәпле, 4 нче сыйныфтан соң укуны дәвам итү мөмкин түгел иде. Бик күп кыенлыкларга карамастан, ул яшәү көчен югалтмый иде.
Клавдия Петровна сөйләвенчә, басуларда солы һәм арышны урак белән чапканнар, көлтәләр ясаганнар. Ул вакытта авылда 6 бригада эшли, кырда да, фермада да барлык эшләр кул белән башкарыла. Сугыштан соң фронтовиклар — авыл Советы башлыгы Петр Кадыйров, Ленин исемендәге колхоз рәисе Кирилл Патрин була.
Клавдия Петровнаның әтисе, Петр абый, беренче тракторчыларның берсе була: ул авылга 30 нчы еллар уртасында килгән тешле тракторда эшли. Аны сугышка алмыйлар.
Тормышында юбилярга һәрвакыт авыр хезмәт белән шөгыльләнергә туры килә иде. Җәен — кырда, кышын фермада эшли. Башта 10 елдан артык Суворов исемендәге колхозда сарыклар карый, аннары күпмедер вакыт мәктәптә техник булып эшли. Иң авыр эш — утынны кулдан кисү, аларны яру, голландкаларны ягу иде. Мәктәп исә ул вакытта өч шәхси бинада була.
- Миңа, гаиләдә иң өлкән бала буларак, һәрвакыт әнием белән сеңелләремне карарга туры килә иде. Бәлки шуңа күрә яшь чагымда кияүгә чыга алмаганмындыр. Бары тик 30 яшьтә, 1975 елда гына, без авылдашыбыз Николай Мискин белән гаилә кордык, ләкин миңа әни булырга насыйп булмады, - ди үзе турында Клавдия Петровна.
Ире Николай үлгәннән соң ул шул йорттан китә һәм 1976 елда үзенә йорт сатып ала һәм ялгызы яши башлый. Ялгыз яшәсә дә, үзен ялгыз хис итми иде ул. Аның сеңлесе Лиза һәм энесе Николай гаиләсе белән авылда яшиләр. Аларның балалары шулай ук еш килеп, кар чистартырга яки хуҗалык буенча башка эшләрне башкарырга булышалар.
Аңа 90 яшь булуга карамастан, ул яхшы хәтергә ия һәм хәтта сугыш вакытында өлкәннәрдән өйрәнгән берничә җыр җырлаган.
— Хәзер яшәү күпкә җиңеләйде, барысы да бар, пенсия бирәләр, ризык бар, әмма без инде олы яшьтә, — дип сөйли ул, үткән елларын искә алып.
Клавдия Петровнаны юбилее белән котлыйбыз, тынычлык, туганнарының игътибарын, иминлек, озын гомер һәм тыныч картлык телибез.