Чүпрәледә "Дуслык белән без бердәм!" халык иҗаты фестиваленең муниципаль этабы узды
Татарстан Республикасында яшәүче халыкларның туган телләрен, мәдәниятен һәм гореф-гадәтләрен саклау һәм үстерү, республиканың күпмилләтле халкының бердәмлеген ныгыту максатыннан 2021 ел Татарстан Республикасы Президенты Рөстәм Миңнеханов Указы белән туган телләр һәм Халыклар бердәмлеге елы дип игълан ителгән иде.
Бу нәтиҗәле ел эчендә Татарстанда һәм безнең Чүпрәле муниципаль районында туган телләр һәм Халыклар бердәмлеге елына багышланган бик күп чаралар үткәрелде.
Бүген, 24 декабрьдә, Иске Чүпрәленең 1 нче мәктәбе базасында "Без дуслык белән бердәм!" дип аталган халык иҗаты фестиваленең муниципаль этабы узды. Фестиваль барлык мәктәпләрдә һәм гомуми белем бирү учреждениеләрендә туган телләр һәм Халык бердәмлеге елына багышланып үткәрелгән чараларга йомгак ясады.
Фестивальдә районның гомуми белем бирү мәктәпләре укучылары ике категория буенча катнашты, беренче категория – 1-4 сыйныф укучылары, икенче категория-5-8 сыйныф укучылары.
Фестивальдә катнашучыларны Чүпрәле районы Башкарма комитеты җитәкчесе урынбасары Айрат Җәләлов сәламләде. Ул район башлыгы Марат Гафаров исеменнән һәм үз исеменнән барысын да Туган телләр һәм Халыклар бердәмлеге бәйрәме, якынлашып килүче Яңа ел белән котлады. Катнашучыларга рәхмәт сүзләрен җиткереп, барысына да сәламәтлек һәм уңышлар теләде.
Шунысын да билгеләп үтәргә кирәк, фестивальдә катнашучыларның барлык номерлары да югары дәрәҗәдә әзерләнгән иде, барысы да җырга яисә хореографиягә туры килеп торган милли костюмнардан иде.
Фестиваль ахырында һәр катнашучыга һәм коллективка Рәхмәт хатлары тапшырылды.