Сәясәт яшьләрне көтә

Сәяси өлкәдә үз-үзен күрсәтергә теләгән яшьләр өчен яңа проект уйлап тапканнар. “ПолитЗавод-2016” поектында катнашырга теләүчеләр бүгеннән башлап 26 октябрьгә кадәр анкета тутырырга тиеш. Берничә этапта иң көчле яшьләр сайланачак. Җиңүчеләргә сәясәт өлкәсендә зур мөмкинлекләр вәгъдә ителә.

“Бердәм Россия” башкарма комитеты җитәкчесе Андрей Кондратьев сүзләренчә, сәясәткә үтеп керү юлларын ябык дип санаучылар күп. “ПолитЗавод-2016” башлангычы – сәяси яктан актив яшьләргә Татарстанның иҗтимагый-сәяси тормышына ишекләрне ачучы мәйдан булачак. Ачык конкурс нәтиҗәсендә чын-чынлап актив, максатчан, акыллы яшьләр сайлап алыначак. Җиңүчеләр һәм финалистлар Россия Дәүләт Думасы, Татарстан Дәүләт Советы депутаты ярдәмчесе, муниципаль берәмлек башлыгы ярдәмчесе вазифасына тәкъдим ителәчәк.

Проектка 18-35 яшьләрдәге кызлар һәм ир-егетләр чакырыла. Катнашырга теләге булган кешеләр Полидзавод.рф сайтында заявка бирергә тиеш. Андрей Кондратьев әйтүенчә, проектка 600ләп катнашучы алыныр дип көтелә. Иң яхшыларны сайлап алу исә өч этапта башкарылачак - “Политзавод. Запуск” (10 октябрь - 10 ноябрьдә), “ПолитЗавод. Ритм (10-15 ноябрь) һәм “ПолитЗавод. Яшьләр праймеризы” (15-22 ноябрь) оештырылачак. Беренче этапта күзгә-күз сөйләшүләр нәтиҗәсендә ТОП-100 сайланачак. Аннары кызыклы спикерлар белән белем бирү сессиясе һәм “Дебатлар” дигән коммуникация уены оештырылачак. Бу турдан соң инде 50 кеше генә калачак. “Яшьләр праймеризы” җиңүчеләрне ачыкларга ярдәм итәчәк. Сайлап алу этапларының һәркайсы тулысынча ачык форматта узачак.

- Без үз-үзен сәясәтттә сынап карарга, үзенең тормышын бу өлкә белән бәйләргә теләгән барлык яшьләрне бу проектта катнашырга чакырабыз. “ПолитЗавод” проекты егет-кызларга үзмаксатына ирешүдә ярдәм итәчәк, - ди Андрей Кондратьев.

Гүзәл НАСЫЙБУЛЛИНА

http://intertat.ru/