Татарстанда авыл хуҗалыгы объектлары арткан

Бөтенроссия авыл хуҗалыгы санын алуга әзерлек уңаеннан Татарстанда авыл хуҗалыгы объектлары исемлегенә төгәллекләр кертелде. Сентябрьнең беренче яртысында статистика хезмәте шәһәр һәм бистәләрдәге авыл хуҗалыгына җәлеп ителгән җирләрне һәм аларда асралган терлек санын ачыклады.

Бөтенроссия авыл хуҗалыгы санын алу киләсе 2016 елның 1 июленнән 15 августына кадәр узарга тиеш. Илнең үзәктән ераграк торак пунктларында ул 15 сентябрьдән 15 ноябрьгә кадәр үтәчәк. Әлеге сан алу нәтиҗәсендә җыелган мәгълүматлар дәүләтнең аграр сәясәтен камилләштерергә, авыл хуҗалыгын үстерү өчен төбәк һәм муниципаль дәрәҗәдәге эшчәнлекне билгеләргә ярдәм итәчәк.

Татарстанда авыл хуҗалыгында сан алуга әзерлек Федераль дәүләт статистика хезмәтенең Татарстан буенче территориаль органы тарафыннан республика Авыл хуҗалыгы һәм азык-төлек министрлыгы, ветеринария хезмәте, бакчачылар берлеге, фермерлар ассоциациясе, гомумән, авыл хуҗалыгына бәйле бөтен идарәләр белән берлектә алып барыла.

Сентябрьнең беренче яртысында халыкның җир участоклары мәйданы, аларның кулланылышы, асраган терлек башы турындагы мәгълүматлар бөтен ил буенча тикшерелде. Татарстанстат матбугат үзәге хәбәр иткәнчә, республикада бу эшкә 381 хезмәткәр җәлеп ителгән булган. Алар шәһәр һәм шәһәр тибындагы бистәләрдә 166 387 объектны, шулай ук гражданнарның коммерцияле булмаган авыл хуҗалыгы объектларына кергән 1398 объектны һәм ул объектлардагы 377 718 участокны тикшергән.

Татарстанстатның Авыл хуҗалыгы һәм табигый әйләнә-тирәлек статистикасы бүлеге җитәкчесе Әлфинур Мостафина сүзләренчә, бу тикшерү барышында районнарда соңгы елларда шактый яңа авыл хуҗалыгы объектлары барлыкка килүе ачыкланган. Бигрәк тә Алексеевск, Болгар, Лаеш, Кукмара, Саба, Балтач һәм Зәйдә яңа төзелешләр күп, ә Баулы, Балык Бистәсендә күпбалалы гаиләләргә җир кишәрлеге бүлеп бирелгәнгә исемлек тулыландыруны таләп итәчәк.

Кайбер шәһәрләрдә беренчел исемлек бакчачылык берләшмәләре юк ителгәннән соң алар урынында калкып чыккан шәхси тораклар исәбенә озынайган. Бакчаларга килгәндә, аларда да участоклар саны арткан. Мондый хәл аеруча Баулы (фаразланганнан 8 объектка күбрәк), Бөгелмә (161), Югары Ослан (19), Биектау (110), Лениногорск (10) районнарында, Казан (299) һәм Чаллы (67) шәһәрләрендә күзәтелгән.

Яңа мәгълүматлар 1 октябрьгә кадәр Бөтенроссия авыл хуҗалыгында сан алу автоматлаштырылган системасының республика мәгълүмат базасына кертелергә тиеш булачак. Әйтергә кирәк, халыктан җыелган әлеге шәхси мәгълүматлар закон белән саклана.

1 октябрьгә кадәр Бөтенроссия авыл хуҗалыгында сан алу чарасының рәсми талисманына исем сайлау да тәмамланачак. Быел җәй интернетта үткәрелгән бәйгегә теләгән һәркем авыл хуҗалыгында сан алу талисманы булырдай рәсем ясап җибәрергә мөмкин иде. Җиңүчегә 50 мең сум күләмендә премия вәгъдә ителде. Интернет аша тавыш бирүләрдән соң 347 катнашучы арасыннан беренче урынны көләч йөзле ашлык көлтәсе рәсемен ясаган Самар өлкәсе Сызрань шәһәреннән Наталья Иванова алды. Бу “көлтә” авыл хуҗалыгында сан алу чараларын бизәп торачак.

Лилия ГАДЕЛШИНА

http://intertat.ru/