Яшь белгечләрне кайда яраталар?

Яшь белгечләргә эш табу җиңел түгел. Кайбер оешмалар аларны колач җәеп каршы алса, башкалары, киресенчә, бик яратып бетерми. Superjob.ru тикшеренүләр порталы шуны ачыкланган: яшь белгечләрнең әзерлек дәрәҗәсе белән эш тәкъдим итүчеләрнең яртысы гына канәгать.

Сораштыру шуны күрсәткән: бүген илебездәге ширкәтьләрнең бары тик 62 проценты эшкә яшь белгечләрне кабул итә. Югары уку йортын тәмамлаганнарны эре бизнес ширкәтләре эшкә бик теләп ала икән. Ә кече бизнес белән шөгыльләнүчеләр, киресенчә, кичәге студентларны алырга атлыгып тормыйлар. Бу аңлашыла да, бюджетлары зур булган оешмаларның яңа хезмәткәрләрне өйрәтү мөмкинлекләре дә бар. Ә кече бизнес, гадәттә, моны булдыра алмый. Төрле эшчәнлек алып бара торган оешмалар арасында яшь белгечләрне IT һәм банк сферасында бик яратып алалар. Төзелеш оешмаларына исә вуз тәмамлаучылар сирәк урнаша.

Узган ел белән чагыштырганда, яшь белгечләрне кабул итүче ширкәтләрнең саны 70 проценттан 62 процентка кимегән. Мөгаен, әлеге күренеш тотрыклы булмаган икътисади вәзгыятькә дә бәйледер. Шуңа күрә эш белән тәэмин итүчеләр тәҗрибәлерәк белгечләрне алырга тели. Кызыклы статистика да бар. Вуз тәмамлаганнары кабул итүчеләр 2013 елда күп булган. Ә 2009 елда, киресенчә, яшь белгечләрне эшкә алырга теләүчеләр аз булган.

Шунысын да билгеләп узарга кирәк: югары уку йорты тәмамлаучыларга беренче эш урыны сынау срогы белән тәкъдим ителә. Рекрутерлар сүзләренчә, үзләрен яхшы яктан күрсәткән яшь белгечләрне алга таба карьера үсеше көтә. Шуңа күрә кичәге студентларга нинди вазифага алганнарына карап түгел, ә ширкәткә карап эш итәргә тәкъдим итәләр. Еш кына кичәге студентларны сату-алу буенча менеджер, клиентлар белән эшләүче хезмәткәр, сатучы-консультант, квалификацияле эшче вазифаларына кабул итәләр.

Башка еллар белән чагыштырып карасак, тәҗрибәсе булмаган яшь белгечләрне квалификацияле эшче, программист, икътисадчы, укытучы вазифаларына кабул итә башлаганнар. Хәтта алга таба өйрәтү максаты белән хезмәт урыны тәкъдим итүчеләр дә булган.

Ләкин шулай булса да, эшкә кабул итүчеләр яшьләрнең һөнәри әзерлегеннән канәгать дип әйтеп булмый. Аларның 1/3, гомумән, канәгать түгел. Банк сферасында эшләүчеләр үзләрендәге яшь белгечләр турында уңай фикердә. Ә сәнәгать өлкәсендә эшләүчеләр исә, киресенчә, аларга эшкә килгән яшьләр турында тискәре фикердә.

Эшкә урнашу өчен иң нәтиҗәле ысул булып рекрутинг сайтлары тора. Эш белән тәэмин итүчеләрнең 60 проценты яшь белгечләрнең эшне интернеттан тапканын белдерә. Ә кадрлар хезмәте, хезмәткәрләр тәкъдиме аша эш табучылар сирәгрәк.