Фәрит Мөхәммәтшин: 13 сентябрьдә Татарстан Президентына ышаныч белдерү референдумы булды

“Татарстанда быел сайлауларда катнашучылар саны 84,2 проценты тәшкил итеп, бу күрсәткеч узган елгы сайлаулардан да югарырак булды. Халык үзенең активлыгы белән киләчәк көнгә битарафсызлыгын күрсәтеп, Татарстан җитәкчелегенә ышаныч белдерде”, – диде ТР Дәүләт Советы рәисе Фәрит Мөхәммәтшин сайлауларның нәтиҗәләренә багышланган матбугат очрашуында.

 

Россиядә йокысыз төн артта калды: 13 сентябрьдә, Бердәм сайлау көнендә, Татарстанда да җитди сайлаулар узды – халык республика Президентын һәм муниципаль берәмлекләрнең вәкаләтле органнарына депутатлар сайлады. 7716 депутатлык мандатына үткәрелгән сайлауларның нәтиҗәләре якын бер-ике көндә билгеле булачак, ә менә Татарстан Президенты вазифасына 4 сәяси партиядән дәгъва иткән кандидатлардан “Бердәм Россия” тарафдары Рөстәм Миңнеханов, 94,4 процент тавыш җыеп, җиңү яулады.

 

– Рөстәм Миңнехановны без дәүләт эшендә күп еллар беләбез, ул үзен алдынгы карашлы, өлгер җитәкче буларак танытты, аны федераль хакимият белән дә эшлекле мөнәсәбәтләр бәйли. 13 сентябрьдәге сайлауларның сәяси нәтиҗәләре турында әйткәндә: Татарстан Президенты җитәкчелегендәге бүгенге хакимият һәм муниципаль берәмлекләрнең башлыклары гади халыкта яклау табып, “Бердәм Россия” партиясенә ышанычны яңартты. Җәмгыятьнең теләктәшлеге Татарстан Президентына тагын да тырышып эшләргә көч бирде. Кешеләр Рөстәм Миңнехановның эшен бәяли. Бу уңайдан, илдәге икътисади кризиска карамастан, республикада социаль проблемаларны хәл итүгә юнәлдерелгән утызлап “Президент программалары”ның уңышлы тормышка ашырылуын телгә алмый мөмкин түгел, – дип фикерләре белән уртаклашты “Бердәм Россия” партиясенең Татарстан төбәк бүлеге сәяси советы сәркатибе.

 

Фәрит Мөхәммәтшин сайлауларның ачык һәм законлы нигездә үтүен ассызыклады. “Барлык кандидатлар тигез хокукларда, бернинди “кара пиар”сыз гадел шартларда катнашты. “Бердәм Россия” партиясендә электән үк көндәшләрне тәнкыйтьләүдән рейтинг ясамаска килешенгән. Куандырганы шул: көз көне сайлаулар оештыру уңайсыз, дигән куркулар акланмады. Кешеләр бакча эшләренә карап кына сайлау участокларына килми калмады. Быелгы сайлауларда праймериз, ягъни партия эчендә алдан тавыш бирү чарасын үткәрүгә мин баштарак шикләнеп караган идем, әмма, тәҗрибә күрсәткәнчә, праймеризның файдасы зур булды. Беренчедән, без сайлау алды кампаниясенә иртәрәк керештек һәм, икенчедән, бу хәрәкәткә башка кешеләр, бигрәк тә яшьләр теләп кушылды, ә гади халык белән очрашуларда аларның теләк-тәкъдимнәрен ишетергә җай туды. Татарстанның халык җыеннарын уздыру тәҗрибәсен бүген федераль хакимият бүтән төбәкләргә дә үрнәк итеп тәкъдим итә”, – ди Фәрит Мөхәммәтшин.

 

Быелгы сайлауларда шунысы игътибарга лаек: республикада Президентны соңгы унбиш елда беренче тапкыр халык турыдан-туры сайлады. “90нчы еллардагы сайлаулар белән бүгенге сайлаулар арасында аерма зур, – ди Фәрит Мөхәммәтшин. – Партияләр үзгәрде, законнар үзгәрде. Бүген Россиядә 87 сәяси партия теркәлгән, аларның 67се Татарстанда үз бүлекләрен ачты. Бу күренеш халыкның актив иҗтимагый тормыш белән яшәвен дәлилли. 90нчы елларда Россиядә, Татарстанда проблемалар да шактый иде. Бүген алар чишелә – торак шартларын яхшырту, капиталь ремонт, юллар, мәктәпләр, балалар бакчалары кебек социаль объектлар төзү... Көнкүрешебездәге уңай якка үзгәрешләрне халык күреп тора, шуңа күрә алар сайлауларга да күтәренке кәеф, киләчәккә өмет белән барды”.

 

Халык белән очрашуларда Татарстан Президентын сайлау – ул республика җитәкчесенең Президент атамасын саклау өчен тавыш бирүгә тиң, дигән бәяләмәләрне дә ишетергә туры килде, ди Фәрит Мөхәммәтшин. “Сайлауларда тавыш бирүчеләрнең 84,2 проценты катнашуын исәпкә алганда, аларның сайлау участогына килүе Татарстан җитәкчесенең Президент атамасы өчен дә тавыш бирергә теләвен аңлатмый калмый. Соңгы вакытта илдә әлеге тема бәхәсләр уятса да, Татарстанда иң югары вазифаи затның Президент дип аталуы Россия Конституциясенә каршы килми. Россия Конституциясе төбәкләрнең җитәкчеләре һәм закон чыгару органнары атамаларын билгеләүне субъектларның үз карамагына калдыра”, – ди Татарстан парламенты рәисе.

 

Сентябрь аенда исә Татарстан парламентында эш бик тыгыз булачак. ТР Дәүләт Советы утырышында Татарстан Президентының инаугурация көнен билгеләү бурычы тора. Фаразлар буенча, тантаналы төстә Татарстан Президенты вәкаләтләрен кабул итеп алу чарасы 18 сентябрьгә планлаштырыла. Шулай ук Президент яңа Хөкүмәтне формалаштырырга һәм Дәүләт Советына еллык Юлламасын җиткерергә тиеш.

Лилия ГАДЕЛШИНА

http://intertat.ru/