Чүпрәле муниципаль районы

Корбан гаете көнне - хәйрия марафоны!

2015 елның 17 сентябре, пәнҗешәмбе

Корбан гаете көнне, ягъни 24 сентябрьдә Татарстан мөселманнары Диния нәзарәте "Яңа гасыр" телеканалы белән берлектә хәйрия чарасы оештыра.

"Сөючеләр фида кыла" чарасы Татарстанда өченче мәртәбә уза. Проект авторларыннан алынган мәгълүматларга караганда, телемарофон “Ярдәм” фондының “Гаилә җылысы” инвалид-ятимнәрне тернәкләндерү приютындагы балаларга ярдәм итү максатыннан гамәлгә ашырыла.

Телемарафон 6.30 сәгатьтә Кол Шәриф мәчетендә узачак гает намазының турыдан-туры трансляциясе тәмамлануы белән башланып китә һәм 9.00 сәгатькә кадәр дәвам итәчәк.

Мәгълүм булганча, 2013 елда үткәрелгән телемарофон нәтиҗәсендә Теләче районының Җөри авылында ике бина алынды, үзәкне оештыру эшләре җайга салынды. Җөридә Интертат.ру коллективы да булып кайткан иде.

2014 елда марафонда катнашучылар ярдәмендә биналар әнисез, әтисез калган, аның өстенә сәламәтлекләре начар булган балаларны кабул итәрлек дәрәҗәгә җиткерелде. Балаларга махсус медицина җиһазлары алынды, үзәкнең тирә-юнендәге җирлек тәртипкә китерелде. 2015 ел башында Татарстан Республикасы Президенты Рөстәм Миңнеханов әлеге үзәккә махсус җайлаштырылган микроавтобус бүләк итте.

Быел Татарстан мөселманнары Диния нәзарәте янә барыбызны марафонда катнашырга һәм хәйрия эшенә үз өлешебезне кертергә чакыра! Телемарафон балаларны дәвалау өчен шартлар тудыру ниятеннән оештырыла.

Марафонда катнашу өчен 7715 номерына "Нур" сүзен язып SMS җибәрергә кирәк һәм телефон хичсабыннан инвалид-ятим балаларның тернәкләндерү үзәге счетына 50 сум акча алыначак (төгәл сумма операторга бәйле). Сәдака бирергә теләвегезне раслауны сорап, җавап SMS киләчәк. Бу бик мөһим: раслаусыз акчаларыгыз балаларга барып җитми.

Әгәр сез зуррак сумманы күчерергә теләсәгез, "Нур" сүзеннән соң буш ара (пробел) калдырып, күчерергә теләгән суммагызны языгыз. Иң мөһиме – аны расларга онытмагыз.

Шулай итеп, 7715 номерына "Нур" сүзе белән SMS яки "Нур" буш ара (пробел) һәм сез күчерергә теләгән сумманы язып SMS җибәрергә кирәк.

Аллаһы Тәгалә садакаларыгызны кабул итсен һәм безгә – ярдәмгә мохтаҗ кешеләргә булышып торырга һәрвакыт мөмкинлек биреп торсын.

Ә 18 сентябрь көнне “Ярдәм” мәчете чатырында “Сөючеләр фида кыла” телемарафоны кысаларында хәләл ярминкә уздырыла. Ярминкә халыкка хәләл продукцияләр турында җиткерү максатыннан уза, дип хәбәр итә Татарстан Диния нәзарәтенең матбугат үзәге.

http://intertat.ru/

БАРЛЫК ЯҢАЛЫКЛАРНЫ УКУ