Чүпрәле муниципаль районы

Чүпрәледә үзара салым кертү буенча референдум уза

2015 елның 22 марты, якшәмбе

Бүген Чүпрәле районында үзара салым кертү буенча референдум уза. Беренче тапкыр әлеге чара 2014 елда узган иде.

Халыктан үзара салым кертү авыл җирлекләрендәге социаль-мөһим мәсьәләләрне хәл итәргә ярдәм итәчәк. Моннан тыш, республика бюджетыннан халыктан җыелган акча суммасын дүрт тапкыр арттыру каралган.

1369 номерлы район үзәгендәге сайлау участогына район Башкарма комитеты җитәкчесе Шәүкәт Алиуллов та тавышын бирергә килгән иде.

–Мондый референдумнар Чүпрәледә генә түгел, республиканың барлык районнарында да үтә. Урамдагы лампочкага, юлга, я булмаса башка эшкә һәркем үзеннән өлеш кертә икән, аның кадере бермә-бермә арта һәм аңа карашы да башка төрле була, ягъни-хуҗаларча. Район халкы да моны аңларга тиеш, референдум нигезендә җыелган үзара салым акчалары шушында калачак, шушы район халкы өчен булачак-ди.

Референдум үткәрүгә чүпрәлеләрнең карашы нинди соң? Бу хакта аларның фикерләрен тәкъдим итәбез.

– Җирле мәсьәләләрне хәл итүгә үзара салым акчасы җыю элеккеге елларда ук бар иде. Әлеге чараның кабат яңаруын бик әйбәт дип саныйм. Чөнки барысы да халык өчен эшләнә бит алар, кем дә алып китми,- ди Иске Чүпрәледән Ринат абый Булатов.

Олы яшьтә булуларына карамастан референдумга тавыш бирергә дип Иске Чүпрәле авылы имам-хатыйбы Әмир ага Аббазов та, тормыш иптәше белән килгән:

- Елына бер мәртәбә 200-300 сум акча бирүебез күләдә тамчы гына ул. Хөкүмәтебезгә, аның җитәкчеләренә рәхмәт. Төрле программалар эшли, авыл җирләрен матурайту дәвам итә, нинди генә эшкә тотынсалар да ахырынача җиткереп үтиләр. Иң мөһиме илебездә тынычлык һәм бәрәкәт булсын.

Каенлык урамында яшәүчеләр:

-Үткән ел да килдек, быел да катнашабыз менә. Күреп торабыз, урамнар матурая, безнең урамыбыз да быел юллар рәтләнер дигән өметтә калабыз.

Тынычлык урамында яшәүчеләр:

Мондый чара узуына без бик шат. Үткән ел урамыбызда таш юл күтәрделәр, быел программа нигезендә асфальт булыр дип көтәбез.

Рәмзия ханым Ракипова:

-Без район үзәгендә яшибез. Көн саен районыбызның яңаруына, ямьләнүенә шатланабыз. Балалар бакчалары төзелә, юллар ясала, парклар барлыкка килә, барысына шөкер кылып, сөенеп яшисе генә. Җитәкчеләргә рәхмәт, исәнлек, эшләрендә уңышлар теләп калабыз.

Үзара салым кертү буенча референдум узачак участоклар кичке 20.00 сәгатькә кадәр эшли. Участокларга җитди сәбәпләре булып килә алмаучылар янына, шәхси гаризалары нигезендә, вәкилләр өйләренә йөри.

Гөлия Фәизова

БАРЛЫК ЯҢАЛЫКЛАРНЫ УКУ