Чүпрәле тармаклы технологияләр техникумын 36 студент тәмамлады

Чүпрәле тармаклы технологияләр техникумын 36 студент тәмамлады. Аларга тантаналы төстә дипломнар тапшыру чарасы муниципаль район башкарма комитеты залында үтте.

 

Һәр кызның, егетнең йөзендә шатлыклы, шул ук вакытта моңсулы елмаю сизелә. Әле кайчан гына училище бусагасын тәүге мәртәбә атлап кергәннәр иде алар. Ике ел ярымга сузылган тынгысыз уку еллары бер мизгелдә, күз ачып йомганчы үтте дә китте. Училище алар өчен туган йортка әйләнде, дус коллектив тупланды. Укытучы абый- апалары аларга белгечлек биреп кенә калмадылар, тормышта яшәргә, җәмгыятьтә үз урыныңны табарга да өйрәттеләр. Япь- яшь килеш килгән малайлар һәм кызлар бүген инде кулларына белгечлек дипломнары алып, олы тормыш юлына аяк бастылар.

Яшь белгечләрне муниципаль район башлыгы Александр Шадриков ихлас күңелдән тәбрикләде, туып- үскән җиребезне тагын да матурайту, аның социаль һәм икътисадый тотрыклылыгын ныгытуга үзләреннән лаеклы өлеш кертергә чакырды. Техникум директоры Рамил Ахметовның да үз укучыларына әйтер теләкләре күп булды. Аның сүзләренә караганда,  ике ел ярым эчендә студентларга ныклы белем һәм күнекмә биреп чыгару өчен укытучылар һәм мастерлар күп тырышлык куя. Көчле коллективның эшчәнлеге һәм матди- техник базаның ныклы булуы студентларга теория белән практиканы бергә алып барырга мөмкинлек бирә. Монда укучыларның белгечлекләре буенча яңа талантлары ачыла. Зур Уби авылы кызы Надежда Цыфаркина (укытучысы Сиринә Мохтарова), мәсәлән, республика күләмендә үткәрелгән кондитер- пешекчеләр конкурсында берничә мәртәбә катнашып призлар яулый. Фәрит Хәйретдинов да һөнәри осталык конкурслары призеры.

Казан дәүләт аграр университетының өлкән укытучысы Илдус Гималтдиновның да килүе юкка булмады, берничә студент югары уку йортына керү өчен шунда ук гариза да язды. Район башлыгы Александр Валерьевич автомобильләрне ремонтлау буенча өченче разрядлы слесарьларга, тракторчы- машинистларга, “В” һәм “С” категорияле шоферларга, ягулык салу станцияләре операторларына һәм кондитер- пешекчеләргә дипломнар тапшырды.

Алар арасында кызыл диплом алучылар да булды. Укучыларның әти- әниләре исеменнән чыгыш ясаган Наталия Пустынина районда шундый техникумның булуы, анда уку һәм яшәү өчен бик яхшы шартлар тудырылуына куанычын яшермәде. – Балаларыбызга төпле белем, һөнәри белгечлек һәм ата- аналарга гына хас тәрбия бирүегез өчен чын күңелдән рәхмәт.

Без бик канәгать, киләчәктә дә мактаулы һәм авыр эшегездә уңышлар телибез,- диде Наталия Владимировна. Афәрин, яшь белгечләр, хезмәт юлыгыз имин булсын! 

Рәшит ФӘТХУЛЛОВ