Кубок Кайбычка китте

 

Район үзәгендәге боз мәйданчыгына беренчеләрдән булып Чүпрәле һәм Кайбыч районнары командалары чыкты. Уенның беренче минутларыннан ук кунаклар боз хуҗалары капкасына ташландылар. Биш минут үтәргә дә өлгермәде, Чүпрәле командасы һөҗүмчесенең ике минутлык штрафка чыгуыннан бик оста файдаланып, кайбычлылар исәпне дә ачтылар. Икенче период тәмамланганчы кунаклар көндәшләренең капкасына җавапсыз дүрт алка ташладылар. Өченче периодта безнең егетләр уенны саклап калу өчен тырышты. Нәтиҗәле һөҗүмнәр ясап бер- бер артлы өч алка суксалар да, кайбычлыларның осталыгы күз алдында иде шул. Алар тагын дүрт алка ташлап, гомуми исәпне 8:3 кә җиткерделәр. Шундый ук исәп белән Кайбыч районы хоккейчылары Кама Тамагы командасын да буйсындырды. Икенче һәм өченче урыннар өчен барган уенда якташларыбыз 5:3 исәбе белән Кама Тамагы уенчыларыннан өстен чыкты. Шулай итеп быел беренче мәртәбә Чүпрәле районы башлыгының күчмә кубогы читкә китте. Чүпрәле җыелма командасыннан Салават Мөшәрәпов номинация буенча “Иң яхшы һөҗүмче” призына лаек булды. Уеннарга Татарстан Республикасының хоккей федерациясеннән (Казан шәһәре) Александр Дудкин хөкемдарлык итте, аңа район әһәмиятендәге судья Илдус Мөшәрәпов ярдәм күрсәтте.