Татарстан Республикасы Чүпрәле муниципаль районының Иске Шәйморза авылында яшәүче Мәсхүдә Лотфулла кызы 90 яшьлек юбилеен билгеләп үтте
Озак гомерле хатынның тормышы җиңел түгел, әмма намуслы хезмәт һәм якыннарына мәхәббәт белән тулы.
Татарстан Республикасы Чүпрәле районының Иске Шәйморза авылында яшәүче Мәсхүдә Лотфулла кызы Халикова 2025 елның 10 декабрендә 90 яшьлек юбилеен билгеләп үтте.
Озын гомерле хатынның балачагы авыр сугыш елларына туры килә. Кечкенәдән үк аңа өйдә күп эшләргә, хуҗалыкта, шулай ук колхоз кырында, фермада ярдәм итәргә туры килә.
Юбиляр сөйләвенчә, ул яхшы укыган, колхозда 4 нче сыйныфны тәмамлагач эшли башлый. Бик авыр еллар, ачлык, салкын була, шуңа күрә ул укуын дәвам итә алмый. Олылар белән бер рәттән көннәр буе колхоз кырында хезмәт куя. Ул чакта барлык балалар һәм яшүсмерләр утауда, уракта, печәндә эшләделәр, башак һәм дару үләннәре җыйдылар, колхоз терлекләрен көттеләр, өйдә булыштылар: терлекләрне ашаттылар, чыбык-чабык утырттылар, түтәлләрне утадылар, су сиптеләр, бәрәңге утырттылар.
Гомере буе ул туган авылында, 22 нче партсъезд исемендәге колхозда хезмәт иткән. Төрле елларда фермада да эшли, бозаулар карый, сыер сава, бригадада төрле эшләр башкара. Колхоздан лаеклы ялга, пенсиягә чыга. Эш дәверендә үзен бары тик уңай яктан гына күрсәтә, йөкләнгән эшкә намуслы карый, күп кенә социаль ярышларда катнаша, күп санлы Мактау грамоталары белән бүләкләнә.
Мәсхүдә апа әнисе белән бергә яшәгән, аны караган, шуңа күрә ул әнисен ялгыз калдыра алмаган һәм шул сәбәпле гаиләсен дә булдыра алмаган.
Мәсхүдә апа бик мәрхәмәтле, сеңелесенең кызын — Эльмираны үз кызы итеп тәрбияләп үстергән, кияүгә биргән. Ләкин Мәсхүдә апаның үз балалары юк. Бервакыт Мәсхүдә апаның сеңелесе Эльмира аны Мәскәүгә үзләренә яшәргә чакырган. Мәсхүдә апа анда күпмедер вакыт торса да, туган авылын бик сагынган, туган йортына кайтып китмәкче булган һәм кайткач бүтән өйдән чыкмаган, авылда калган.
Бүгенге көндә Мәсхүдә апа үз өендә ялгызы яши, аны ерак туганы Миләүшә Козырева карый. Мәсхүдә апа Миләүшәгә кайгыртуы өчен бик рәхмәтле. Ул шулай ук күршеләренә, бигрәк тә күршесе Фирдәүсәгә рәхмәтле, алар көн саен аның янына килеп, сәламәтлеген сорашып, аңа һәрнәрсәдә ярдәм итәргә тырышалар.
Мәсхүдә апаның өе җылы, җайлы, аңа бөтен шартлар да тудырылган.
- Яшь чагымдагы кебек өйдә җылы, мичкә ягарга кирәкми. Күптән түгел генә суны өйгә керттеләр, хәзер минем краннан су ага, каядыр суга йөрергә кирәкми, яшә дә яшә,-дип шатлана Мәсхүдә апа.
Мәсхүдә Лотфулла кызының юбилеена аның туганнары да килгән.
Юбилярны Татарстан Республикасы Чүпрәле муниципаль районы Башкарма комитеты җитәкчесе Рөстәм Мөхәмәтҗанов, Иске Шәйморза авыл җирлеге башлыгы Илһамия Мөхитова котладылар. Чүпрәле муниципаль районы башлыгы урынбасары Алексей Ярухин исеменнән котлау открыткасы, истәлекле бүләкләр, чәчәк бәйләме тапшырып, алар Мәсхүдә апага ныклы сәламәтлек, туганнары һәм якыннары ягыннан игътибарлылык һәм кайгыртуларын тоеп яшәвен теләделәр.
Мәсхүдә апа кунакларның килүенә бик шатланды, аларга онытмаулары һәм котлаулары өчен олы рәхмәтен җиткерде.