2014 елда "Халык контроле" системасында 69% гаризәләр уңай хәл ителгән

“Халык контроле” дәүләт мәгълүмат системасының 2014 елдагы эшчәнлеге нәтиҗәләре билгеле булды. Бу хакта бүген ТР Министрлар Кабинетында узган брифингта белешмә бирелде.

Татарстанда әлеге системага мөрәҗәгать итүләр, 2013 ел белән чагыштырганда, 63 процентка арткан, димәк, халык система белән кызыксына, аның нәтиҗәлелеген, файдасын күрә дигән сүз.

ТР мәгълүматлаштыру һәм элемтә министры урынбасары Тимур Зарипов “Халык контроле” системасына булган мөрәҗәгатьләр турындагы статистик мәгълүмат китерде. 2014 елда барлыгы 21 556 мөрәҗәгать кабул ителгән. Шуларның 15 931е буенча билгеле бер эшчәнлек алып барылган. Хәл ителгән мөрәҗәгатьләр күрсәткече 69 процентны тәшкил итә. Муниципаль районнар буенча кабул ителгән мөрәҗәгатьләр саны 16 931гә тигез. Министр урынбасары әлеге күрсәткеч буенча Яр Чаллы, Түбән Кама, Казан, Әлмәт шәһәрләре башкарма комитетларының уңышка ирешүен билгеләп узды, шулай ук Лениногороск, Баулы, Зәй, Саба районнары алда. Ә иң күп мөрәҗәгатьләр Казан шәһәре буенча кабул ителгән. Үтәлмәгән мөрәҗәгатьләр күрсәткече буенча артта калган муниципаль районнар: Биектау, Чистай, Лаеш, Аксубай, Буа, Балык Бистәсе һәм Теләче. Былтыр мөрәҗәгатьләрнең нибары 1400е генә нигезле рәвештә кире кагылган, шул исәптән 346сы финанс яктан тәэминат булмау сәбәпле.

Министр урынбасары Тимур Зарипов, Татарстанда кеше хокуклары буенча вәкаләтле аппараты белән берлектә, “Халык контроле” системасына яңа категорияләр кертелүе турында да җиткерде. Хәзер гражданнар экстремизм, милләтара һәм динара низаглар, коррупция белән көрәш һәм җитештерүдә имгәнү категорияләре буенча да системада мөрәҗәгать калдыра ала.

“Халык контроле” системасы эшли башлаганнан алып (Ә ул 2012 елның апреленнән гамәлдә. - Ред.) барлыгы 33 510 мөрәҗәгать кабул ителгән. Шуларның 23 910ы хәл ителгән. 4206сы исә, дәлилле рәвештә, кире кагылган. 5169 мөрәҗәгать буенча эшләр алып барыла”, – дип белдерде Татарстанда кеше хокуклары буенча вәкаләтле Сәрия Сабурская. Аның сүзләренә караганда, торак пунктларны төзекләндерү, юллар, торак-коммуналь хезмәтләр, транспорт мәсьәләләре аеруча актуаль.

"Татар-информ" МА материаллары буенча