Чүпрәле муниципаль районы

Бүген Бөтенроссия гаилә, мәхәббәт һәм тугрылык көне

2014 елның 8 июле, сишәмбе

Бүген Бөтенроссия гаилә, мәхәббәт һәм тугрылык көне билгеләп үтелә. Ул иң беренче тапкыр Гаилә елы дип игълан ителгән 2008 елда билгеләп үтелгән иде. Бу бәйрәм Дәүләт Думасы депутатларының инициативасы белән кертелде. Шунысы кызык, Гаилә көнен билгеләп үтү Россиядәге барлык традицион дини оешмаларда яклау тапты, чөнки мәхәббәт белән тугрылыкның конфессиональ чикләре юк. Изге Петр һәм Феврония көнен бәйрәм итү чын рус традициясе, ул Көнбатышта билгеләп үтелә торган Изге Валентин көненә каршы куелып килгән.

Бу бәйрәмнең идеясе моннан берничә ел элек Владимир өлкәсендәге Муром шәһәре кешеләрендә туган. Бу шәһәрдә христиан никахының химаячеләре ирле-хатынлы изгеләр Петр белән Феврония күмелгән. 8 июль аларны искә алу көне булып тора.

Яңа бәйрәмнең инде “Мәхәббәт һәм тугрылык өчен” дигән истәлек медале дә бар, аны шушы көнне тапшыралар. Россиядә мәхәббәт символы итеп саналган ромашка чәчәге бу бәйрәмнең дә символы булып тора.

БАРЛЫК ЯҢАЛЫКЛАРНЫ УКУ