Җирле телевидение заманлаша

Хәзерге вакытта Татарстан телевидениесе иң авыр чорларның берсен кичерә. Телекомпанияләргә иҗади идеяләргә бай, аналитик фикерле журналистлар кирәк. Үз тармагының алыштыргысыз белгече булган профессиональ алып баручылар, продюсер һәм режиссерларга да ихтыяҗ зур.

Әлеге фикерне безгә КФУның массакүләм коммуникацияләр һәм социаль фәннәр институтының телевидение кафедрасы җитәкчесе, тарих фәннәре докторы Резеда Даутова җиткерде. Аның сүзләренә караганда, заманча технологияләр үсеше һәм икътисад базарының бүгенге торышы телекомпанияләр алдына яңа бурычлар куя. Аларга көндәшлеккә сәләтле булу өчен кызыклы проектлар гына җитми, контентларының уникаль булуы да кирәк. Ә тармакны югары әзерлекле кадрлар белән тәэмин итү – иң мөһим максатларның берсе.

Резеда ханым Татарстанның башка районнарында эшләүче җирле телеканалларны да үстерү кирәклеген ассызыклый. Хәзерге вакытта “Татмедиа” компаниясе составында 23 шундый телеканал бар. Аларның үзенчәлеге – халыкка даими рәвештә үз шәһәр яки районындагы яңалыклар турында хәбәр итү.

- Аларның төп кыйммәте дә нәкъ менә шунда. Чөнки республикакүләм телеканаллар теләсәләр дә, халык белән андый тыгыз мөнәсәбәт урнаштыра алмый, - дип саный Резеда Даутова.

Узган елның көзенда бу институтның телевидение кафедрасы “Татмедиа” агентлыгы белән берлектә түгәрәк өстәл оештырган иде. Анда сүз нәкъ менә җирле телевидениене үстерү һәм камилләштерү турында барды. Биредә республиканың төрле район һәм шәһәрләреннән килгән телестудия вәкилләре дә катнашты. Чара ахырында районнарда эшләүче телевидение тармагы журналистлары өчен өстәмә курслар оештыру кирәк дигән нәтиҗә ясалды. Чөнки андагы хезмәткәрләрнең күбесе – журналистика нигезләрен үзлегеннән өйрәнгән каләм ияләре.

- Белүемчә, “Татмедиа” бу өлкәдә эшне башлап җибәрде инде. Безнең кафедра да әлеге төр курсларны уздырырга, телевидение белгечләре катнашында төрле мастер-класслар үткәрергә әзер, - дип дәвам итте сүзен Резеда Даутова.

Җитәкче фикеренчә, “Татарстан-Яңа гасыр”, ВГТРК “Татарстан”, “Эфир”, “Казан” телекомпанияләре бүгенге көндә яхшы иҗади коллектив булдыруга ирешкән. Хәзер төп бурыч – әлеге компанияләрне киләчәктә югары әзерлекле кадрлар белән тәэмин итү. Шушы максатны күздә тотып, телевидение кафедрасы студентларны яңа технологияләр ярдәмендә заман таләпләренә туры китереп әзерләүгә аеруча зур игътибар бирә - хезмәттәшлекнең яңадан-яңа юлларын эзли.

Мәсәлән, хәзерге вакытта кафедра Төркиянең Истанбул университеты белән сөйләшүләр алып бара икән. Биредә инде күп еллар дәвамында “Телевидение, радио һәм кино” юнәлеше буенча кадрлар әзерләнә. Тиздән әлеге ике кафедра арасында күпер булдырылып, бердәм тикшеренүләр һәм лекцияләр уздыру өчен шартлар тудырылачак.

Шунысын да билгеләп үтү кирәк, кафедра милли телевидениене камилләштерү киркәлеген дә ассызыклый. Шуңа күрә яңа уку елында биредә югары белемле белгечләр һәм бакалаврлар өчен яңа магистр программалары эшли башлаячак. Аларның берсе тематик телевидениегә багышланган булса, икенче программа исә милли телевидениене үстерүне күздә тота. Биредә белем алучылар милли телевидениенең глобаль коммуникацияләр системасындагы роле турында белем туплаячак.

Рәмзия ЗАКИРОВА