Тәмәкегә киткән акча - бер букча

Агымдагы елның 1 июнендә Россиядә тәмәке белән бәйле федераль законның икенче өлеше гамәлгә керәчәк. Яңа кагыйдәләр нигезендә тәмәке көйрәтүчеләргә тыныч тормыш бетәчәк, дип саный белгечләр.

Бу законның беренче өлеше 2013 елда ук кабул ителгән иде. Аның нигезендә самолетларда, җәмәгать транспортында, мәгариф һәм мәдәният учреждениеләрендә тәмәке көйрәтү тыелды. Подъездларда, лифтта да тәмәке тартырга ярамый башлады. Законның иң кырыс өлешләрен гамәлгә кертүне исә 2014 елның 1 июненә калдырдылар...

Тәмәке дә, кальян да тыела

Татарстанның Роспотребнадзор идарәсе җитәкчесе урынбасары Алмас Имамов сүзләренә караганда, 1 июньнән гамәлгә керәчәк канунны өч өлешкә бүләргә мөмкин – сигарет тартуны, сатуны һәм таратуны тыю. Беренчесенә килгәндә, ай башыннан ерак араларга йөрүче поездларда һәм көймәләрдә тәмәке тарту тулысынча тыелачак. Әле алай гына да түгел, кафе, бар, ресторан, төнге клублар да сигарет исеннән тулысынча арынырга тиеш була. Тулай тораклар һәм кунакханәләрдә дә тәмәке тартырга ярамаячак. Бу биналарда сигарет көйрәтү өчен махсус урыннар булдырылырга да тиеш түгел, хәтта. Югыйсә, закон бозган өчен бина хуҗалары административ җаваплылыкка тартылачак.

Чикләүләр яшьләр арасында хәзер аеруча популяр булган кальянга да кертелә. Кальян тарту урыннарын тотучылар үз бизнесларын туктатырга тиеш була яисә инде электрон кальяннар куллануга күчә.

Алмас Имамов белдергәнчә, закон гамәлгә керер алдыннан ресторан һәм кафелар ачык террасалар ясауга керешкән икән. Шул рәвешле алар тәмәке турындагы законны “урап узмакчы” була. Тик бу ысул нәтиҗәле булмаячак, дип ышандыра җитәкче.

- Ачык террасада тартырга ярый, тик ул башка биналарга терәлеп тормаска тиеш. Әгәр дә кафеда тәмәке көйрәтүләре ачыклана икән, аның хуҗасына 30 мең сум штраф түләргә туры киләчәк, ә кунак исә 500 сум түли, - дип аңлатты Алмас Имамов.

Аның сүзләренә караганда, 2013 елда Роспотребнадзор идарәсе вәкилләре тәмәкегә каршы законны бозган өчен 133 протокол төзегән. Нәтиҗәдә, штраф күләме 600 мең сум тәшкил иткән. Агымдагы елның дүрт аенда исә законны үтәмәгән өчен 72 протокол гына төзегән булсалар да, штраф күләме 500 мең (!) сумга кадәр җиткән.

Кибетләрдә тәмәке каплары юкка чыга

Тиздән тәмәке белән сәүдә итү өлкәсендә дә чикләүләр шактый катгыйланачак. 1 июньнән тәмәкене кибет һәм махсус павильоннарда гына сатып алырга мөмкин булачак. Өстәвенә, тәмәке каплары кеше күзеннән тулысынча юкка чыга.

- Сигарет турындагы мәгълүмат ак фонга бертөрле зурлыктагы кара хәрефләр белән языла. Алфавит тәртибе буенча төзелгән исемлектә беринди дә рәсем булырга тиеш түгел. Сатып алучыга тәмәкене үзе сораса гына күрсәтергә ярый, - дип дәвам итте сүзен Татарстанның Роспотребнадзор идарәсе җитәкчесе урынбасары Алмас Имамов.

Әйтергә кирәк, Татарстанда әлеге законның үтәлешен быел ныклы контрольгә алырга булганнар. Төрле идарәчелекләр махсус рейдларга чыгып күзәтү оештырачак. Мәсәлән, Роспотребнадзор идарәсе вәкилләре кафе һәм рестораннарга йөриячәк, хастаханәләрдәге тәмәке көйрәтүчеләр белән Сәламәтлек саклау министрлыгы көрәшәчәк. Әгәр дә инде автобус йөртүче бертуктаусыз тәмәке тарта икән, бу турыда кичекмәстән Юл хуҗалыгы һәм транспорт министрлыгына хәбәр итәргә кирәк.

Шәһәр җирендә яшәүчеләрнең күбесен исә подъездлардагы тәмәке исе, йорт ишегалларында сигарет тартып утыручылар борчый. Алар өчен исә идарәче компанияләр җавап бирергә тиеш булачак.

- Без бу турыда торак йортлар өчен җаваплы оешмалар белән сөйләштек. Идарәче компанияләр подъездларга яки балалар мәйданчыкларына “тартырга ярамый” дигән махсус билгеләр урнаштырырга тиеш. Әгәр дә андый билгеләр юк икән, бу оешмалар административ җаваплылыкка тартылачак. Кагыйдә буларак, подъездда тәмәке тартучылар шул бер үк кешеләр. Аларны эзләп табып, штраф түләргә мәҗбүр итү авыр булмаячак, - дип саный Казан башкарма комитеты җитәкчесе урынбасары Ләйлә Фазлыева.

Укучыларыбыз игътибарына тәмәке турындагы законны бозган өчен каралган штарфлар күләмен дә тәкъдим итәбез. Шәхси затларга 500 сумнан алып 1500 сумга кадәр, ә юридик затларга исә 30 меңнән алып 50мең сумга кадәр акча чыгарырга туры киләчәк.

Тагын бер мәгълүмат – 1 июньдә Татарстан халкы өчен махсус “кайнар линия” телефоны эшли башлаячак. 562-56-40 номерына шалтыратып, тәмәке белән бәйле яңа закон турында тулы мәгълүмат ала аласыз. Биредә әлеге начар гадәт белән көрәшергә дә ярдәм итәчәкләр.

Рәмзия ЗАКИРОВА

http://intertat.ru/