Чүпрәле муниципаль районы

Тукай шәхесен тасвирлаган рәссамны искә алалар

2014 елның 23 мае, җомга

Татарстанның халык рәссамы Магдалина Мавровскаяның тууына 100 ел уңаеннан 23 майда “Хәзинә” милли сәнгать галереясендә күргәзмә ачыла.

Күргәзмә Мавровскаяның (1914-2012) якты истәлегенә багышлана. Рәссам иҗатында илебез тарихы белән ихлас кызыксыну да, бүгенгесенә дә җанлы караш сизелә. Аның график эшләнмәләре 1942 елдан бирле ТАССРның күпсанлы күргәзмәләрендә, Россиякүләм оештырыла торган “Зур Идел”, “Совет Россиясе” дигән чараларда еш тәкъдим ителгән.

Магдалина Мавровская тумышы белән Свердловск өлкәсеннән, Татар сәнгать техникумын (хәзерге Казан сәнгать училищесы) тәмамлаган, рәсем сәнгатендә графика жанрында үз юлын тапкан иҗатчы. Аның хезмәтләрендә иске Казан күренешләре дә үзәктә тора. Заманында ул Тукайны яхшы хәтерләгән кешеләр белән күрешеп аралашкан, шуңа күрә кечкенә Апуш, аның туганнары, якыннары портретлары, шагыйрь булган урыннарны ясаган рәсемнәр чынбарлыкка якын туры килә, дип фаразлыйлар.

Магдалина Мавровская ясаган рәсемнәр Тукайның тормыш юлына багышланган китапларны, музейларны бизи. Татар шагыйре Габдулла Тукай иҗатын сөючеләр өчен Магдалина Мавровская исеме яхшы таныш. Аның шагыйрь туган ягы - Казан арты авылларын, кечкенә Апуш яшәгән урыннарны ясаган рәсемнәре шактый күп.

Күргәзмәдә рәссамның 60 лап графюрасы, акварель һәм рәсемнәре урын ала.

«Деревня Кокушкино – место первой ссылки В. И. Ульянова-Ленина», 1967 – 1968 еллар; «Булгары», 1968 – 1969 еллар; «Горьковские места в Казани», 1976 – 1979 еллар; «Башни Казанского Кремля», 1976 – 1978 еллар; «Казань в недалеком прошлом» («Старая Казань»), 1987 – 1989 еллар офорт серияләре рәсем сәнгатен үз итүчеләрдә зур кызыксыну уятачак.

Чара авторлары хәбәр иткәнчә экспозиция 1 июльгә кадәр эшлиячәк.

http://intertat.ru/

БАРЛЫК ЯҢАЛЫКЛАРНЫ УКУ