Чүпрәле муниципаль районы

Сакласаң - яшәрер, сакламасаң - корыр

2014 елның 21 мае, чәршәмбе

Сакласаң – яшәрер, сакламасаң – корыр

“Березка“ җәмгыятенең “Дементьево“ филиалында үткән семинарда катнашучылар чәчүлекләрне корткычлардан сакламаганда уҗымнарның саргаячагын күрделәр. Дөрес, кырлар корып кибә дигән сүз түгел бу. Корткычлар һөҗүм иткән участокларда эшкәртү үткәрсәң, чәчүлекләрне саклап калып була, анысы. Әмма, үсемлеккә үсү өчен бирелгән вакыт тернәкләнүгә китә, нәтиҗәсе буларак, уңыш азая.

Боларның барысын да мисаллар белән дәлилләп “Россельхозцентр“ның райондагы бүлеге белгече Николай Мискин сөйләде. Ул, шулай ук, кайчан нинди химикат һәм үстерә торган препарат кулланылырга тиешлегенә дә тукталды. Үсемлекләрне саклау өчен акча кызганмаучылар бу очракта ота, әлбәттә. Куе яшел булып үсеп утыручы уҗымнар ук моны раслап тора.

Ә семинарның беренче өлеше филиалның җәйләвендә үтте. Монда терлек азыгы әзерләү техникасы төзеп куелган иде. Тик шулай да, әлеге төр техниканы әзерләү эшен нибары “3“ле билгесенә генә бәяләде район башлыгы Александр Шадриков. “Березка“ның эшенә бу яктан тел-теш тидерерлек булмаса да, район буенча терлек азыгы әзерләү техникасын ремонтлап, сафка бастыру, яңаларын алу буенча проблемалар бар“,-диде ул.

Авыл хуҗалыгы һәм азык-төлек идарәсе белгече Җәмил Шәрипов та районда бу төр техниканың җитешмәвен һәм күпчелек хуҗалыкларда иске булуын әйтте.

Саламны да өскертләргә, ике еллык азык запасы әзерләргә дигән бурыч куелганда, булган техниканың гына көче җитмәячәк. Шул ук вакытта сыерларның баш санын арттыру да күздә тотыла. “Сөт җитештерүгә басым ясарга кирәк“,-дип ассызыклады Александр Шадриков.

Авыл хуҗалыгы икътисадын анализлау сөт җитештерүнең табышлы булуын күрсәтә. Азыкны сатып алып ашатканда да, сөткә бәяләрнең югары торуы сәбәпле, бу тармак беренче кварталда “Березка“ җәмгыятендә 16 процент рентабельлелек биргән. Ә азыклары булган җәмгыятьләр тагын да откан, дигән сүз. Моннан чыгып, белгечләргә дә, җитәкчеләргә дә “кул кушырып утырмаска, язның бер көне ел буе туендырсын өчен, бар мөмкинлекләрне дә файдаланырга“,- диелде.

Бүгенге көндә басуларда игенче-механизаторлар чәчүлекләрне өстәмә тукландыра. Район буенча әлеге эш 4150 гектар мәйданда башкарылды. Шул ук вакытта басулар чүп үләннәргә, төрле авыруларга, корткычларга каршы гербицидлар белән дә эшкәртелә. Район буенча 21500 гектар мәйдандагы басулар чүп үләннәренә, бөҗәкләргә каршы эшкәртелде.

“Цильна” җәмгыятендә–2140 гектар, “Ак Барс-Чүпрәле” агрофирмасында 1000 гектар мәйдандагы чәчүлекләр өстәмә сый алды. “Ак Барс-Чүпрәле” агрофирмасында–7100 гектар, “Цильна” җәмгыятендә 4368 гектар мәйдандагы чәчүлекләр гербицидлар белән эшкәртелде. “Березка” җәмгыятендә дә чәчүлекләрне тукландыру һәм корткычларга, чүп үләннәренә каршы эшкәртү эшләре бара.

Резидә Җамалтдинова

БАРЛЫК ЯҢАЛЫКЛАРНЫ УКУ