«Йолдызлык» республика йолдызларын җыя

Бу атнада Казанда «Созвездие-Йолдызлык-2014» фестиваленең суперфиналы башланды. Өч көн дәвамында «Уникс» концертлар залында Татарстанның 43 шәһәре һәм авылларыннан 4 357 катнашучы осталыкларын күрсәтте.

Зона турлары быелның 1 февраленнән 31 мартына кадәр Татарстан шәһәрләре һәм районнарында үтте. Сайлап алу комиссиясе карары нигезендә финалга 5 яшьтән 21 яшькәчә дүрт меңнән артык конкурсант узган. XIV«Созвездие-Йолдызлык» эстрада сәнгате ачык республика телевизион яшьләр фестивалендә 5 яшьтән 21 яшькәчә булган яшьләр «Вокал-соло», «Вокаль ансамбльләр», «Хореография», «Конферанс», «Җырга иң яхшы көй», «Иң яхшы җыр тексты», «Видеоклип» номинацияләрендә ярыша. Һәр номинация эчендә конкурсантлар яшь аермалыклары буенча 3-5 группага бүленә. Аларны урындагы жюри бәяләде. Талантлы һәм өметлеләре фестивальнең зона этабына узды. 1-13 март көннәрендә Казан, Әлмәт, Зәй, Чаллы, Минзәлә, Болгар, Мамадыш, Теләче, Буа, Яшел Үзән шәһәрләрендә «Йолдызлык» проектының оештыру комитеты раслаган жюри төркеме иң-иңнәрне сайлап алган иде.

Хореографик коллективлар арасында аеруча Балык Бистәсе районыннан килгән  «Рапсодия» һәм Яшел Үзән каласыннан «Орфей» халык хореография студиясе үзләрен югары дәрәҗәдә күрсәтте. Әлеге коллективларга йөрүче балалар фестиваль сәхнәсендә күптәннән инде. Шуңа күрә жюри әгъзалары күңеленә юлны яхшы беләләр.

«Вокаль ансамбльләр» һәм «Вокал-соло» номинациясендә катнашучылар арасында «Умырзая», «Каданс» (Яшел Үзән шәһәре) ансамбльләре, шулай ук, «Шатлык» (Казан) вокаль-хореографик ансамбль саф татар телендә чыгыш ясаулары белән күпләрне таң калдырды.

«Йолдызлык» фестиваленең фаворитларыннан саналган Питрәч районыннан килгән «Восторг» триосы яңа составта чыгыш ясады. Күптән түгел генә Россиянең «Голос» телевизион проектында уңышлы чыгыш ясаган Зөлфәт Габдуллин триода күрү күпләр өчен сюрприз булды. Аерым башкаручылар арасында Алиса Суетина (Яшел Үзән), Даниил Пасынков (Казан), Милана Павлова (Казан) үзенчәлекле вокал мөмкинлекләре белән аерылып тордылар.

Проектны оештыручылар хәбәр иткәнчә, «Йолдызлык» фестивалендә катнашу бушлай. Район һәм шәһәрдә җиңгән балаларга икенче турга юллама ала. Казанга узган конкурсантларга махсус мастер-класслар оештырыла, яшәү-ашау чыгымнарын да фестиваль дирекциясе күтәрә.

«Созвездие-Йолдызлык» эстрада сәнгате ачык республика телевизион яшьләр фестивале Татарстан Республикасы Президенты Рөстәм Миңнеханов химаясендә уздырыла.

«Созвездие» фестиваленең гала-концерты 18 апрель көнне «УНИКС» концерт залында узачак.

http://intertat.ru