50 елга якын медицинада: Чүпрәле районыннан Фәридон Хафизовның коткарылган меңнәрчә язмышы
Шушы көннәрдә ТАССРның атказанган табибы, СССРның сәламәтлек саклау отличнигы Хафизов Фәридон Гыйльфан улы 85 яшьлек юбилеен билгеләп үтә.
Бу истәлекле көн белән аны район башлыгы урынбасары Алексей Ярухин һәм район үзәк хастаханәсенең баш табибы Иосиф Кукушкин котладылар. Кунаклар юбилярга истәлекле бүләкләр һәм ТАССРның 100 еллыгы уңаеннан медаль тапшырдылар, аның күпьеллык хезмәте өчен зур рәхмәтләрен белдерделәр.
Фәридон Гыйльфан улы медицинага 50 ел чамасы багышлаган - 1963 елдан ул Чүпрәле район хастаханәсендә эшли, хирург һәм офтальмологтан баш табибның дәвалау бүлеге буенча урынбасарына кадәр юл үтә, баш табиб булып эшли.
.jpeg)
Табиблык эшчәнлегеннән тыш, ул әдәби иҗат белән дә мавыга-аның хикәяләре районның «Яңа юл» газетасында басылып чыга. Эшләгән елларында ул күп санлы Мактау грамоталарына һәм Рәхмәт хатларына лаек була. Аның балалары да әти-әниләре юлын дәвам иттеләр. Хатыны Фрида ханым шулай ук хирургия бүлегендә шәфкать туташы булып эшләгән.
Район халкы Фәридон Гыйльфан улын югары профессионализмы, бай тәҗрибәсе, пациентларга сизгер мөнәсәбәте һәм җаваплылыгы өчен тирән бәяли. Эшенә тугрылыгы, хезмәттәшләренә белем бирергә әзерлеге һәм кешеләр турында эчкерсез кайгыртуы белән медицина җәмәгатьчелеге һәм пациентлар арасында лаеклы хөрмәт яулады.
Кунаклар юбилярга нык сәламәтлек, иминлек, үз көченә ышаныч теләделәр.
- Чын күңелдән сезгә энергиягезне, күңелегезнең яшь булуын, актив озын гомер һәм нык сәламәтлек саклап калуыгызны телибез! Тормышыгызда бары тик шатлык, бәхет һәм иминлек кенә булсын!
Без бу җылы сүзләргә кушылабыз һәм Фәридон Гыйльфан улына якыннары арасында якты һәм шатлыклы еллар телибез!