Чүпрәле районы Түбән Чәке авылында «Туган як» бәйрәме 2014 елдан башлап үткәрелә
Түбән Чәкедә «Туган як көне» узды
Туган як бәйрәме узган мәйданда иртә таңнан музыка яңгырады һәм кунакларны җыр-бию ансамбльләре каршы алды.
Бәйрәмне Түбән Чәке авыл җирлегендә 2014 елдан башлап билгеләп үтәләр. Чараны авыл читендә, матур урында оештыралар. Янәшәдә генә урман һәм иксез-чиксез кыр-басулар.
Түбән Чәке авыл җирлегендә яшәүчеләрне котларга район Башкарма комитеты җитәкчесе Рөстәм Мөхәмәтҗанов, Ульяновск өлкәсеннән вәкилләр килгән иде.
— Бүген зур бәйрәм — туган як көне, Авыл көне. Кешеләр үз гореф-гадәтләрен, бәйрәмнәрен белсәләр, авыл да яшәр, — диде Рөстәм Мөхәммәтҗанов.
Ул, шулай ук, әлеге бәйрәмне үткәрүдә бәяләп бетергесез ярдәм күрсәткәннәргә рәхмәтләрен белдерде һәм район башлыгының Рәхмәт хатларын тапшырды.
Бу ел — төрле тарихи чорларда Ватан өчен көрәшкән барлык кешеләрнең, шулай ук хәзерге геройларга — махсус хәрби операциядә катнашучыларга хөрмәт күрсәтү елы. Бәйрәмгә Ватанны саклаучылар — махсус хәрби операциядә катнашучылар Николай Хмелев һәм Сергей Сергеев, сугышчы-интернационалистлар Петр Арсентьев, Владимир Солдатов, Юрий Кузьмин, Петр Митаев, Чечня сугышында катнашучылар Олег Табартов, Олег Токмаков, Василий Дубанов, Петр Дубанов, Роберт Нуруллин, Анатолий Хохлов, Павел Иванов, Владимир Елизаров чакырылган иде. Аларның барысына да сәхнә түрендә бүләкләр тапшырдылар.
Шулай ук, Түбән Чәке авыл җирлегеннән мобилизацияләнгән егетләрнең әти-әниләренә, туганнарына олы рәхмәт сүзләре җиткерелде, бүләкләр, чәчәкләр бирелле.
Авыл җирлеге башлыгы Артем Солдатов бәйрәм белән котлап, иганәчеләрне Мактау грамоталары белән бүләкләде.
Түбән Чәке авыл җирлегендә яшәүчеләрне, шулай ук, Иске Чәке авылының Архангел Михаил храмы настоятеле Протоиерей Олег, Түбән Чәке авыл җирлегенең ветераннар советы рәисе Николай Кузьмин һәм башкалар да котлады.
Тантаналы өлештән соң спорт ярышлары, уеннар башланды. Гер күтәрү һәм башка спорт ярышлары кебек уеннарда халык көч һәм җитезлек күрсәтте. Төрле сәүдә рәтләре оештырылган иде. Балалар батутларда рәхәтләнеп сикерделәр, күңел ачтылар, тәм-том белән сыйландылар. Дин әһеле Олег атакайның музееннан күргәзмә дә эшләде бу көнне. Бәйрәм барышында, шулай ук, ГТО мобиль мәйданчыгы да оештырылган иде.
Авылның үткәне
Түбән Чәке — Татарстан Республикасы Чүпрәле районының Түбән Чәке авыл җирлеге составына кергән авыл. Түбән Чәке авыл җирлеге составына тагын Югары Чәке, Иске Чәке, Татар Шатрашаны һәм Кече Аксу авыллары керә. Әлеге авылларда, нигездә, татарлар һәм чувашлар яши.
Авыл 1647 елдан бирле билгеле. 18-19нчы гасырның беренче яртысында халкы дәүләт крестьяннары категориясенә караган (лашманчылык йөкләмәсе үтәгән). Аларның төп шөгыльләре игенчелек һәм терлекчелек булган. Авылда 3 мәчет, мәдрәсә, тегермән эшләгән. 1930 елда «Горняк» колхозы оешкан. Бүгенге көндә Түбән Чәке җирлегендә «АгроТрансПорт», «Идел буе цеолиты» җәмгыятьләре эшли.
Танылган кешеләренең кайберләре:
М. К. Абулханов — монтажчылар бригадиры, Хезмәт Даны орденының тулы кавалеры, Хезмәт Кызыл Байрагы ордены кавалеры.
Х. М. Атласов — тарихчы, педагог, дини һәм иҗтимагый эшлекле, II Дәүләт Думасы депутаты.
Р. З. Ильясов — җырчы, ТАССР атказанган сәнгать эшлеклесе, ТАССР халык артисты.
И. Х Мөдәррисов — галим-математик, физика-математика фәннәре кандидаты, профессор.
Авыл яныннан Иске Чүпрәле — Түбән Чәке -Татар Шатрашаны автомобиль юлы үтә.