Чүпрәледә сугыш хәрәкәтләре ветераннары истәлегенә багышланган митинг узды
1 июль, Россиядә истәлекле дата-сугыш хәрәкәтләре ветераннары көне билгеләп үтелә.
Бу көнне илебездә Ватанны төрле чикләрдә саклаган, аның мәнфәгатьләрен яклаган, хәрби һәм гражданлык бурычын үтәгән һәм үтәүчеләрне хөрмәтлиләр.
Бүген Геройлар Аллеясында сугышчы-интернационалистлар һәйкәле янында тантаналы митинг узды, анда сугыш хәрәкәтләре ветераннары, кыска вакытлы ялга кайткан хәрби хәрәкәтләрдә катнашучылар, солдатларның туганнары, хакимият һәм оешма вәкилләре катнашты.
Район башлыгы Марат Гафаров, кунаклар, район җитәкчеләре, сугыш хәрәкәтләре ветераннары, Яшь армиячеләр, традиция буенча, һәйкәлгә веноклар һәм чәчәкләр куйдылар һәм һәлак булганнарны бер минут тынлык белән искә алдылар.
Чүпрәле районы башлыгы Марат Гафаров, Буа һәм Чүпрәле районнары хәрби комиссары Радик Төхфәтуллин сәламләү сүзе белән мөрәҗәгать итте. Чыгыш ясаучылар арасында шулай ук сугышчы-интернационалистлар оешмасы рәисе Виктор Петухов, Чечнядагы сугыш хәрәкәтләре ветераны Данил Ефимов һәм әфганчы Илдар Азизовның әнисе Вера Азизова бар иде.
Чара барышында район башлыгы Марат Гафаров һәм хәрби комиссар Радик Төхвәтуллин махсус хәрби операциядә һәлак булган Мансур Илдус улы Насыйбулловның үлгәннән соң бүләкләнгән Батырлык орденын әтисе Илдус Насыйбулловка тапшырдылар.
Митинг вакытында шулай ук сугыш хәрәкәтләре ветераннарына район башлыгының Мактау грамоталары һәм Рәхмәт хатлары, ВДВның 104 нче дивизиясе командирының Рәхмәт хатлары, Сугыш хәрәкәтләре ветераннары, запастагы хәрби хезмәткәрләр, ТР “Щит Отечества” гаскәрләренең чик буе һәм башка төрләре региональ иҗтимагый оешмасының Рәхмәт хатлары, “Төньяк Кавказдагы сугыш хәрәкәтләренә 25 ел” истәлекле медальләре, “Чечендәге хезмәт” билгеләре тапшырылды.