Чүпрәле муниципаль районы

Чүпрәледә 7855 гектар мәйдандагы бөртекле-кузаклы культуралар урып-суктырылган

2015 елның 5 августы, чәршәмбе

Районда 7855 гектар мәйдандагы бөртекле-кузаклы культуралар урып-суктырылган. Шул исәптән, 383 гектар мәйданда – арыш, 7006 гектар мәйданда– көзге бодай, 100 гектар мәйданда борчак һәм 336 гектар мәйданда арпа культуралары уңышы җыеп алынган. Район буенча һәр гектардан уртача уңыш 14,6 центнерны тәшкил итә.

Район авыл хуҗалыгы һәм азык-төлек идарәсеннән 3 августка алынган мәгълүматларга караганда, районда урак эшләре 20 процентка башкарылган. Көзге культураларны урып-суктыру эшләре 80 процентка тәмамланган.

Урып-җыю эшләре буенча һәр елдагыча “Цильна” җәмгыяте игенче-механизаторлары алдынгы урыннарда бара. Биредә бүгенге көндә 1430 гектар мәйданда урып-җыю эшләре башкарылган. Уңышы да ярыйсы гына, һәр гектардан уртача 23,7 центнер чыга.

“Ак Барс-Чүпрәле” агрофирмасында 3910 гектар мәйданда урып-җыю эшләре башкарылган (көзге культураларның 75 проценты урып-суктырылган). “Шәйморза” җәмгыятендә 302 гектар мәйдандагы бөртекле-кузаклы культураларның уңышы җыеп алынган.

Район буенча 2268 тонна салам әзерләнгән. “Цильна” җәмгыятендә– 900 тонна, “Ак Барс-Чүпрәле” агрофирмасында 773 тонна салам тюкларга төрелеп, саклауга куелган.

–Быел җәй коры килде. Кышын яисә язын терлек азыгына кытлык булмасын өчен, салам җыюга да тиешле игътибар булырга тиеш,- диләр бу уңайдан авыл хуҗалыгы һәм азык-төлек идарәсе белгечләре.

Районда урып-җыю белән бер үк вакытта туфракны көзге культуралар чәчүгә әзерләү эшләре дә башланды. Әлеге эш район буенча 2194 гектар мәйданда башкарылды. “Цильна” җәмгыятендә– 620 гектар мәйданда, “Ак Барс-Чүпрәле” агрофирмасында 971 гектар мәйданда туфрак әзерләнгән.

Римма МӘҮЛЕТОВА

БАРЛЫК ЯҢАЛЫКЛАРНЫ УКУ