Президент праймеризына соңгы нәтиҗә ясалды

30 июнь көнне Татарстан Президенты вазифасына праймериз уздыру буенча махсус инициатив төркем вәкилләре үзләренең соңгы утырышына җыелды. Биредә алар шушы көннәрдә уздырылган праймериз нәтиҗәләрен раслады.

Билгеле булганча, Татарстан Президенты вазифасына “Бердәм Россия” партиясеннән кандидатлар тәкъдим итү буенча праймериз 27 июнь көнне үткәрелде. Әлеге чарада Татарстан Президенты вазифаларын вакытлыча башкаручы Рөстәм Миңнеханов җиңү яулады. Сайлауда катнашкан 1588 сайлап алучының 1513е нәкъ менә аның өчен тавыш бирде. Бу барлык катнашучыларның якынча 95 проценты дигән сүз. Башка кандидатлар: Татарстан авыл хуҗалыгы һәм азык-төлек министры Марат Әхмәтов – 874, Олег Морозов – 789, ә Сергей Батин – 705 тавыш җыйдылар (шунысын әйтергә кирәк, бер сайлап алучыга берьюлы өч кандидат өчен тавыш бирү мөмкинлеге тудырылган иде). Тавышлар саны буенча Сергей Батин Президентлыкка кандидат булудан туктады.

Праймериз югары дәрәҗәдә узды

Бүген исә праймериз уздыру буенча махсус инициатив төркем вәкилләре үзләренең соңгы утырышларына җыелды.

- Праймериз шактый оешкан төстә узды. Чакырылган затларның 98 проценты сайлауда катнашып, Президентлыкка кандидат буенча үз фикерен җиткерде. Бүген исә без праймериз нәтиҗәләрен раслап, әлеге документны “Бердәм Россия” партиясенең Татарстан бүлеге сәяси советына тапшырабыз, - дип ассызыклады Татарстан Президенты вазифасына праймериз уздыру буенча инициатив төркем рәисе Илгиз Хәйруллин.

Ул инициатив төркем вәкилләренә рәхмәт сүзләре җиткерде. Ә праймериз нәтиҗәләре турындагы протоколны исә Илгиз әфәнде кулыннан “Бердәм Россия” партиясенең Татарстан бүлеге башкарма комитеты җитәкчесе Андрей Кондратьев кабул итеп алды.

- Мин әлеге праймеризны ничек уздырып җибәрербез дип борчылган идем, чөнки моңа кадәр республикада андый тәҗрибәнең кулланылганы булмады. Хәзер исә зур ышаныч белән әйтә алам: сез бу эшне тиешенчә, югары дәрәҗәдә башкарып чыктыгыз, - дип инициатив төркем вәкиллрәенә мөрәҗәгать итте Андрей Кондратьев.

Инициатив төркем үз эшен дәвам итә

Хәзер исә “Бердәм Россия” вәкилләре алдында өч кандидаттан торган йомгаклау документын раслау бурычы тора. “Бердәм Россия” партиясеннән Татарстан Президенты вазифасына дәгъва итәчәк затның исеме 4 июль көнне үткәреләчәк партия конференциясендә билгеле булачак.

Бүгенге чара ахырында инициатив төркем вәкилләре үз эшләрен туктатмаска, ә алга таба да дәвам иттерергә кирәк дигән нәтиҗәгә килде. Татарстан Президенты сайлауларының республика өчен ни дәрәҗәдә зур вакыйга булуын истә тотып, алар сайлау кампаниясендә актив катнашу фикере белән чыкты. Әлеге эшчәнлек, беренче чиратта, “Бердәм Россия” партиясе тарафыннан тәкъдим ителгән кандидатны хуплау, аңа ярдәм итү белән бәйле булачак.

Шунысын да исегезгә төшерәбез: быел праймериз иҗтимагый оешмалар тарафыннан беренче мәртәбә уздырылды. Татарстанда гына түгел, гомумән, Россиядә андый тәҗрибәнең булганы юк иде әле. Әлеге чарада меңләгән кеше катнашты. Аларның 1,5 меңе Татарстанның төрле шәһәр һәм районнарыннан җыелган сайлап алучылар иде.

Рәмзия ЗАКИРОВА.

http://intertat.ru/