БДИ: тагын шул математика...

Бердәм дәүләт имтиханнары дәвам итә. Бүген Татарстанның 15 меңнән артык чыгарыш укучысы математика буенча профиль дәрәҗәдәге сынауда үз белемен тикшерде. Сайлау буенча геграфия һәм рус әдәбиятын тапшыручылар исә инде үз нәтиҗәләрен белде. Татарстан укучылары бу сынауларны югары дәрәҗәдә үтә алган.

Әле берничә көн элек кенә укучылар математика буенча база дәрәҗәдәге имтиханны тапшырган иде. Анысында егет-кызлар җиңелчә генә биремнәрне үтәргә тиеш иде. Нәтиҗәләр исә биш баллы система буенча ясалачак. Аттестат алу өчен “өч”ле алу да җитә. Профиль дәрәҗәдәге биремнәр авыррак. Бу төрдәге имтиханны, нигездә техник профильле, математика имтиханы исәпкә алынган, югары уку йортларына керергә өмет итүчеләр тапшыра.

Исегезгә төшерәбез: математика имтиханын ике дәрәҗәгә бүлеп үткәрү быел гамәлгә кертелде. Юкка гына бу предметны фәннәр патшабикәсе дип атап йөрмиләр. Күпләр өчен аны үзләштерү шактый авырга туры килә. Узган елда илебез укучыларының нәтиҗәләре бик түбән булып чыкты. Башта аттестат алу өчен укучы математикадан 24 балл җыярга тиеш иде, имтихан эшләре тикшерелгәннән соң алар киметелде. Рособрнадзор моны җәмгыятьтә социаль киеренкелек булдырмау нияте белән аңлатты. Нәтиҗәдә, имтиханны уңышлы бирдең дип саналыр өчен узган елда математикадан 24 балл урынына 20 балл туплау бурычы гына куелды. Дөрес, рус теле имтиханы күрсәткечләре дә сөенечле булмады. Бу фәннән шулай ук чик балларны киметеп, 36 балл урынына 24 балл җыярга кирәк дип карар кылдылар.

Быелдан математиканы ике дәрәҗәгә бүлеп үткәрү – югары уку йортларына керергә ниятләмәүчеләрне артык интектереп тормау максатын йөртә. База дәрәҗәдәге биремнәрне үтәп, алар рәхәтләнеп аттестатлы булып чыга ала. Укучыларга ике дәрәҗәдәге имтиханны тапшыру мөмкинлеге дә бирелде. Әйтик, укучы база дәрәҗәсендәге имтиханда өчле алып, профиль дәрәҗәдә минималь баллны туплый алмаса да, аттестатсыз калмый дигән сүз.

Татарстанда бүген БДИны 86 пунктта тапшыралар, аларда on-line режимда видеокүзәтү һәм металл рамкалары эшли. Имтихан сәгать 10.00 да башланды. Профиль дәрәдәҗәге имтиханда барлыгы 21 бирем кертелгән, аларны укучылар 3 сәгать 55 минутта башкарып чыгарга тиеш. Минималь балл – 27. Имтихан нәтиҗәләре 10 көннән билгеле булачак, дип хәбәр итә Татарстан Мәгариф һәм фән министрлыгының матбугат хезмәте.

Шул ук вакытта быелгы беренче имтиханнар нәтиҗәләре билгеле булды. 25 майда илебезнең чыгарылыш сыйныфлары географияне һәм рус телен тапшырган иде.  Гомумән алганда, бу фәннәр буенча нәтиҗәләр яхшырган. Шулай итеп, географиядән уртача балл 2,6 процентка арткан (2014 елда – 64,73, быел – 67,33). Рус әдәбияты буенча уртача күрсәткеч 4,58 баллга яхшырган (2014 елда – 53,84,  быел – 58,42). Гомумроссия күрсәткечләре белән чагыштырганда, Татарстан укучыларының нәтиҗәләре шактый югарырак.

Өч татарстанлы география буенча бердәм дәүләт имтиханында 100 балл җыйган, рус әдәбияты буенча – 2 укучы максималь нәтиҗә күрсәткән. 2014 ел белән чагыштырганда, бу фәннәр буенча минималь балл җыя алмаучылар саны да кимегән. Әгәр 2014 елда рус әдәбияты буенча андыйлар 20 булса (2,15 процент), быел – 6, 2014 елда географиядән 9 укучы (3,18 процент)минималь балл җыя алмаган, быел - 6 (2,42 процент) .

 

Бердәм дәүләт имтиханының төп этабында сынау узучылар саны:

Рус теле - 18329

Математика (база дәрәҗә) - 8624

Математика (профиль дәрәҗә) -  15663

Җәмгыять белеме - 9211

Физика - 5384

Тарих - 2368

Биология - 3352

Химия - 2546

Инглиз теле - 1550

Информатика - 1423

Рус әдәбияты - 1037

География - 292

Немец теле - 47

Француз теле - 22

Испан теле - 1

http://intertat.ru/