Чүпрәледә Балалар Сабантуе гөрләде

Җәйнең беренче көне күңелләргә җылылык, яктылык, мәрхәмәтлелек өстәүче бәйрәм – Балаларны яклау көне буларак истә кала. Аны 1950 елдан башлап зурлап үткәрәләр. Бу көнне дөньяның 30дан артык илендә яшәүче нәниләр өчен күптөрле чаралар, тамашалар оештырыла.

Ел саен Чүпрәле районында 1 июнь – Халыкара балаларны яклау көне уңаеннан Сабан туе  үткәрү матур гадәткә әверелде. Бу бәйрәмдә балалар көчлелектә, чыдамлылыкта, җитезлектә ярышалар. Быел да балалар  җырладылар, биеделәр, чүлмәк вату, көянтә-чиләк белән су ташу, капчык киеп йөгерү, йомыркалы кашык кабып йөгерү, ат чабышы, аркан тарту кебек күңелле уеннарда катнаштылар.

Район башлыгы Александр Шадриков та бәйрәм уңаеннан балаларга изге теләкләрен юллый:

–Хөрмәтле балалар!  Сезне бәйрәм белән котлыйм. Әлеге матур июнь көне  безнең үсеп килүче буын алдындагы җитди җаваплылыгыбызны тагын бер кат искәртә. Сезнең сау-сәламәт булуыгыз, сыйфатлы белем алуыгыз, спорт, иҗат белән шөгыльләнүегез, рухи үсеш кичерүегез өчен шартлар тудыру–төп бурычыбыз. Без төрле дәрәҗәдәге олимпиадаларда, спорт ярышларында, иҗади конкурсларда урын алган укучыларыбыз белән горурланабыз. Үз уңышлары белән алар Чүпрәле  төбәгенең сәләтле балаларга бай булуын исбатлыйлар. 1нче июнь–каникуллар башланган көн дә.  Лагерьларда сәламәтлегегезне ныгытырсыз, җәйне күңелле һәм кызыклы уздырырсыз,  дип ышанам. Бәхет, сәламәтлек, яңа тәэсирләр телим!

Чарада район Башкарма комитеты җитәкчесе урынбасары Айрат Җәлалов та катнашты. Бәйрәмнең матур бер хатирәсе булып 14 яше тулганнарга паспортлар тапшырылу да калачак.

Ел саен бу бәйрәмдә район белем учреждениеләренең туристик-эзләнү отрядларының слеты уза. Һәр мәктәптән кызлар- егетләр зирәклекләрен һәм тапкырлыкларын, җитезлекләрен  эшкә “җигәләр”.  Берничә төр биремнән торган әлеге  бәйгенең  җиңүчеләре  билгеләнә.  Ә мәйданның бер өлешендә мәктәп коллективлары үз тормышларын чагылдырган  палаткалар корганнар, кул эшләнмәләре алып килгәннәр.

Уен-көлке, җыр-биюдән тыш, балалар өчен бәйрәмдә төрле күңел ачулар да оештырылды. Балалар рәхәтләнеп  батутларда сикерделәр, таганнарда әйләнделәр, тәмле ризыклардан авыз иттеләр. Балалар Сабан туе–күңелле вакыйга һәм ул гомерлеккә хәтер сандыгында  сакланыр.

Гөлия Фәизова