Чүпрәле муниципаль районы

Май бәйрәмнәрендә тәртипне 5,5 мең кеше саклаячак

2015 елның 30 апреле, пәнҗешәмбе

Май бәйрәмнәре чорында Татарстанда хулиганлык очраклары аеруча еш теркәлә икән. Соңгы елларда исә тыелган урыннарда тәмәке тарткан өчен җаваплылыкка тартылучылар саны да кискен арта башлаган.

Бу турыда Эчке эшләр министрлыгының җәмәгать урыннарында тәртип саклау, Татарстанның башкарма хакимият һәм җирле үзидарә органнары белән хезмәттәшлек итү идарәсе җитәкчесе Надир Закиров хәбәр итте.

Җитәкче китергән мәгълүматларга караганда, Бөек Ватан сугышында җиңүнең 70 еллыгына багышланган бәйрәм тантаналарында барлыгы 600 мең кеше катнашыр, дип уйланыла. 1 май бәйрәме исә якынча 40 мең кешене берләштерер дип фаразлыйлар. Шуңа күрә май яллары чорында халык куркынычсызлыгын тәэмин итү аеруча мөһим максатларның берсе буларак карала.

Һәйкәлләр сак астында

Билгеле булганча, бу чорда полиция хезмәткәрләренең эше бермә-бер арта. Алар бәйрәм чаралары уза торган урыннарда тәртип саклау белән бергә ветераннарга карата кылынырга мөмкин булган җинаятьләрне булдырмау өлкәсендә дә актив эшләячәк.

- Беренче чиратта, бу эшчәнлек ветераннарның орден-медальләрен урлау очракларына юл куймау белән бәйле. Шуңа күрә хәзерге вакытта Бөек Ватан сугышы ветераннары яшәгән йортларга барып, алар белән аралашу, аңлату эшләре алып бара башладык, - дип сөйләде безгә Надир Закиров.

Май бәйрәмнәре чорындагы тагын бер эшчәнлек Дан монументлары, һәйкәлләр һәм Бөек Ватан сугышы хәрбиләре күмелгән урыннарны саклау, аларны бозуга, җимерүгә юл куймау белән бәйле. 1-12 май көннәрендә әлеге объектларны полиция хезмәткәрләре, шәхси сак оешмалары һәм халык дружиначылары саклаячак. Бу эш тәүлек буена барыр, дип уйланыла.

- Хәзерге вакытта Татарстанда шундый 2126 объект бар. Аларны саклауда исә якынча 3390 кеше катнашырга тиеш, - дип дәвам итте сүзен җитәкче.

Бәйрәм чорында тәмәке тартма

Шунысын да билгеләп үтү кирәк, май бәйрәмнәре чорында тәртип саклауда барлыгы 5,5 мең полиция хезмәткәре катнашыр, дип фаразлана. Аларның 2 меңе – 1 май бәйрәмендә эшләсә, калган 3,5 меңе Җиңңү бәйрәме белән бәйле чараларда тәртип саклаячак.

- Бәйрәм чаралары башланыр алдыннан полиция хезмәткәрләре һәрбер мәйданны җентекләп тикшерәчәк. Бу эштә техник чаралар да файдаланылачак, кинологлар да чакырылачак. Машина кую урыннарында да полиция хезмәткәрләре саны бермә-бер артыр, дип уйлыйбыз, - дип ассызыклады Надир Закиров.

Шулай да, май бәйрәмнәре бернинди хәвеф-хәтәрсез узсын өчен хокук сакчыларының тырышлыгы гына җитми, ә халыкның да игътибарлы булуы сорала. Бары тик шул чагында гына бәйрәм яллары күңелле узачак.

- Кагыйдә буларак, май бәйрәмнәре чорында Татарстанда хулиганлык очраклары аеруча еш теркәлә. Соңгы елларда исә тыелган урыннарда тәмәке тарткан өчен җаваплылыкка тартылучылар саны да кискен арта башлады, - дип белдерде Надир Закиров.

Рәмзия ЗАКИРОВА

http://intertat.ru/

БАРЛЫК ЯҢАЛЫКЛАРНЫ УКУ