«Созвездие-Йолдызлык»ның сайлап алу турлары тәмамланды

«Созвездие-Йолдызлык-2015» ачык республика яшьләр телевизион эстрада сәнгате фестиваленең сайлап алу турлары тәмамланды. Соңгы, унынчы зональ тур Кайбычта үтте. Хәзер җыр-биюгә оста балалар һәм яшьләр суперфиналга Казанга җыелачак.

«Созвездие-Йолдызлык» фестиваленә 15 ел тула. Фестивальнең быелгы программасы Бөек Ватан сугышында Җиңүнең 70 еллыгына багышлана. Традиция буенча, иҗади ярыш анда өч номинациядә оештырыла: вокал, хореография һәм конферанс, ягъни - нәфис сүз. Фестивальдә ел саен 5 яшьтән алып 21 яшькәчә 70 мең сәнгать сөюче яшьләр катнаша. Фестиваль хәрәкәте ел дәвамында тынып тормый: сайлап алу турларыннан, йомгаклау концертларыннан тыш, балалар өчен кышкы һәм җәйге лагерьләр үткәрелә. Кышын алар Казанның «Сосновый бар» лагеренә җыелса, җәй көне Кырымда диңгез буенда ял итә. Ял итеп кенә калмый, концертлар да куя, җыр, бию һәм нәфис сүз осталыгы буенча танылган сәнгатькәрләрдән мастер-класслар ала.  Болар, нәтиҗәдә, балаларны һәм аларның остазларын музыкаль чыгышның сыйфатын күтәрү өстендә эшләргә мәҗбүр итә.

Татарстанның һәм Россиянең халык артисты, Казан дәүләт консерваториясе профессоры Зилә Сөнгатуллина җитәкчелегендәге жюри әгъзалары да киңәшләрне жәлләми. Кайбычта ике көн дәвам иткән сайлап алу туры тәмамлангач, һәр катнашучы жюридан чыгышының өстенлекләре һәм кимчелекләре турында «түгәрәк өстәл» артына утырып сөйләште. Зилә Сөнгатуллинаның бигрәк тә остазларга киңәше бар иде: «Баланы сәхнәдә башкалардан аерылып торырлык итеп тәкъдим итә белү мөһим, чөнки бу - конкурс. Һәм шуңа күрә сирәк башкарыла торган, колак өчен «яңа» җырларны карарга кирәк. Гомумән, яңа җыр - ул инде онытылган иске җыр, эзләгез!» - диде жюри рәисе. Татарстанның атказанган артисты, телевидение дикторы Илфат Абдрахманов, үз чиратында, нәфис сүз номинациясендә чыгыш ясаучыларга сөйләгәндә интонацияне дөрес куярга һәм сәхнәдә кыланмаска, ясалмалылыктан качарга киңәш итте. Татарстанның халык артисты, Татарстанның Дәүләт җыр һәм бию ансамбле баш балетмейстеры Раилә Гарипова булышлыгы белән дә балалар күп кенә катлаулы бию хәрәкәтләренең серенә төшенде.

- «Созвездие-Йолдызлык» фестивалендә берничә буын тәрбияләнеп үсте. Бу балалар инде тормышта югалып кала торганнардан түгел, чөнки аларга тырышлык, түземлелек, сабырлык, максатчанлык хас. Алар кечкенәдән төрле кешеләр белән аралашырга өйрәнә, дуслыкның кадерен белә. Мондый яшьләребез булганда илебезнең киләчәге өчен борчыласы юктыр, мөгаен. Иҗат юлын сайлаган балалар Татарстанның мәдәният һәм сәнгать уку йортларын, консерваторияләрне тәмамлый, җиңүчеләр Россия театр сәнгате университетында укырга юллама ала. Мин быелгы фестивальдә консерваториядә белем алырлык, табигатьтән көчле тавыш бирелгән яшүсмерләрне күрдем, аларга безнең уку йортының ишекләре ачык, - дип чакырды Зилә Сөнгатуллина.

Шунысын әйтергә кирәк, фестивальнең җиңүчеләре иганәчеләрнең кыйммәтле бүләкләреннән, акчалата премияләрдән тыш, Татарстан Президентының һәм Татарстан Хөкүмәтенең махсус стипендияләре белән дә бүләкләнә. Ә Гран-прига ия булган баланың исеме күктәге чып-чын йолдызга кушыла.

- Республиканың талантлы балаларын зур сәхнәгә чыгаручы «Созвездие-Йолдызлык» фестиваленең беренче көннәреннән үк безгә Татарстанның беренче Президенты Минтимер Шәймиев ярдәм күрсәтте, аннан соң республиканы җитәкләгән Рөстәм Миңнеханов та фестивальне яшәтүгә һәм үстерүгә күп көч куйды. Фестиваль балаларның иҗади осталыгын камилләштерүгә, аларга тормышта үз урынын табарга юл ача, мөгаллимнәр хезмәтенең абруен күтәрә һәм бөтен районнарда балалар сәнгатенә игътибарны арттыруга этәрә, - дип ассызыклый фестивальнең генераль продюсеры Дмитрий Туманов.

Чыннан да, быел фестивальнең зональ сайлап алу туры тәүге тапкыр Кайбычта оештырылды. Район Мәдәният сараена Кайбычтан һәм күрше-тирә районнардан - Апас, Чүпрәле, Буа, Кама Тамагы, Югары Ослан, Тәтештән, - барлыгы 800дән артык бала җыелды. Ике көн дәвам иткән иҗади ярышта алар жюри алдында 200дән артык музыкаль чыгыш тәкъдим итте. Аларның 40тан артыгы суперфиналга узды.

- «Созвездие-Йолдызлык» фестивален каршы алу Кайбыч районы өчен зур вакыйгага әверелде. Без махсус шуның өчен район Мәдәният йортын ремонтлап чыктык. Моңа кадәр безнең коллективлар сайлап алу турларына бүтән районнарга йөри иде. Иң куанычлысы - балаларыбыз сынатмады, зональ турда ук унлап призлы урынга ия булдык. «Авыл-DANCE» бию ансамбле, җырчылабыз Гөлназ Гайнуллина, Азалия Миңнуллина, Рәмис Закиров, нәфис сүз осталары - Зилә Рәхмәтуллина белән Ислам Рәхмәтуллиннар беренче урынны яулады. Районыбыздагы 38 Мәдәният йортының бөтенесе дә төзек-матур, шуларның бишесе - республика программасы буенча төзелгән өр-яңа биналар. Кадрлар мәсьәләсен хәл итү өстендә эшлибез. Мәдәният йортлары гөрләп торсын өчен аларга талантлы яшьләрне тарту кирәк, - дип сөйли Кайбыч районы башлыгы Альберт Рәхмәтуллин.

Кайбычның «Авыл-DANCE» бию төркеме белән районның мәдәният бүлеге башлыгы Рамилә Әбләзова җитәкчелек итә. Балалар яратып, аңа «Матур апа» дип эндәшә. Ул үзе дә элегрәк алар кебек үк «Созвездие-Йолдызлык»та катнашып йөргән, шигырьләр яза, җырлый да.

- Быелгы фестивальгә әзерлекне без сентябрьдән башладык. Бөек Җиңүнең 70 еллыгы уңаеннан, бер хореографик композициябез сугыш темасына булды. Биюләрне Казаннан кайтып балетмейстер Ренат Хәйруллин куйды. Без «Созвездие-Йолдызлык»та ел саен катнашабыз, кышкы лагерьгә дә чакырылган идек. Анда шушы биюләребезне күрсәтеп, мастер-классларда хореографларның киңәшләрен тыңладык. Биюләрне бик оста башкарабыз, Казанга суперфиналга барырга курыкмыйбыз, - ди «Авыл-DANCE»та биюче кыз, Кайбыч урта мәктәбенең 10 сыйныф укучысы Гүзәл Сафиуллина.

Казанда суперфинал исә бик тиздән, 13-17 апрель көннәрендә булачак. Анда Казан, Азнакай, Түбән Кама, Чаллы, Әгерҗе, Аксубай, Питрәч, Биектау, Яшел Үзән һәм Кайбычтагы зональ турларда 1нче, 2нче һәм 3нче урыннарны алган яшьләр җыелачак.  Йомгаклау Гала-концертлары 18 апрельдә «УНИКС» концертлар залында һәм 25 апрельдә «Пирамида» мәдәни-күңел ачу комплексы сәхнәсендә узачак. Соңгысын дәүләт дәрәҗәсендәге кунаклар тамаша кылыр һәм ТӨРЕКСОЙ илләре җырчылары да чыгыш ясар дип көтелә. Гран-при иясе, традициягә кергәнчә, җырчылар арасында гына түгел, биючеләр арасында да билгеләнәчәк.

Кырымга быел җәй ял итәргә 120 бала юл тотарга тиеш. Һәм төп яңалык - көз көне «Созвездие-Йолдызлык» Кырымда да оештырылачак. Кырым Республикасының Мәдәният министрлыгы белән килешенгән инде: Татарстандагы кебек, эстрада сәнгате фестивале Кырым яшьләре арасында да үткәреләчәк. Татарстан ягы оештыру эшләрендә булышлык күрсәтәчәк. 

Лилия ГАДЕЛШИНА

http://intertat.ru/