Чүпрәле муниципаль районы

Бердәм булганда проблемалар хәл ителер (Чүпрәле районындагы халык җыеннарыннан)

2015 елның 11 феврале, чәршәмбе

Эшләсәң була

Кече Чынлы авылы җирлеге районда халык исәбе буенча иң зурларның берсе.

Биредә 1508 кеше яши, 529 йорт исәпләнә. Барлыгы 628 пенсионер, 61 мәктәпкәчә яшьтәге бала, 125 мәктәп укучысы бар. Эшкә сәләтле булган авыл халкы, нигездә, “Цильна” хуҗалыгында хезмәт куя.

Авыл җирлеге башлыгы Әнсар Хәкимов та үзенең чыгышында ел дәвамында халык өчен эшләнгән уңайлыкларны санады. Бу “Чиста су” программасы нигезендә сулар кертү, кибетләрнең эшләве, ветеринария пункты ачылуы, ФАП төзелүе, балалар өчен спорт мәйданчыгы булдырылу һәм башкалар.

Тырышып эшләгән Кече Чынлы халкы иртәгесе көн өчен дә алдан кайгыртып, максат куеп яши. Үткән ел халык тарафыннан банклардан алынган кредитлар да терлек абзарлары төзүгә, яңартуга, техника алуга тотылган.

“Цильна” хуҗалыгы җитәкчесе Барис Гафуров еллар дәвамында сыналган олы тәҗрибәсеннән чыгып, саннар, фактлар, мисаллар белән дәлилләп, хуҗалыкны тагын да үстерү бурычын куйды. Шул ук вакытта, авылда хәл ителәсе проблемалар да юк түгел. Республика күләмендә үтүче семинарларда төрле районнардан килгән кунакларны каршы алу өчен төзек матур юллары, юл кырыйларында утлары булмау борчый аларны. Әлеге гозерләрен район башлыгына җиткерделәр алар җыелышта.

Иске Шәйморзада

Кече Чынлының чат күршесе Иске Шәйморза авылында да яшәеш өчен барлык шартлар тудырылган.

Үзара салым акчасына һәм авылның изге күңелле кешеләре белән берлектә яңа юллар төзелгән, мәдәният йортында төзекләндерү үткәрелгән. Энергияне сакчыл куллану максатында да шактый гына эш башкарылган, лампочкалар алмаштырылган. Әбдриев исемендәге “Шәйморза“ хуҗалыгы буенча да үткән елларга караганда 2014 ел уңышлы ел булган. “Шулай да әле эшлиселәр байтак”, дип бурычлар билгеләде хуҗалык җитәкчесе Рөстәм Әбдриев.

Әмма демографиягә килгәндә, хәлләр мактанырлык түгел, соңгы елларда ул кимүгә таба бара. Үткән ел авылда биш бала туган, 26 кеше үлгән. Өч гаилә теркәлгән булса, икесе таркалган.

Район үзәгеннән ерак урнашкан авылларның берсе буларак, биредә яшәүчеләрне рейс автобусларын йөртү кызыксындыра. Шулай ук, авыл хуҗалыгы өлкәсендә каралган субсидияләр, пенсия күләме турында да сораштылар шәйморзалылар.

Борындыкка клуб кирәк

“Борындык авыл җирлегендә яшәүчеләр эш һәм мәшгульлек белән тәэмин ителгәннәрнең берсе”, диде җыенда катнашкан район башкарма комитеты җитәкчесе Шәүкәт Алиуллов.

Биредәге халык башлыча Борындык элеваторында хезмәт итә. Авыл җирлегендә ике Бөек Ватан сугышы ветераны яши, халык саны монда–515. Үткән ел 12 кеше вафат булган, дүрт сабый дөньяга килгән.

Үткән ел биредә дә башлангыч мәктәпкә төзекләндерү үткәргәннәр, быел балалар бакчасына ремонт көтәләр. Киләчәктә, бер түбә астында аның белән бергә ФАП, авыл җирлеге булыр дип тә планлаштырылган. Үзара салым акчасын зиратның тирә-яннарын рәтләүгә тотканнар. Быел аның күләмен 300 сум итеп җыячакбыз, диләр. Аларны да юлларны рәтләүгә тотмакчылар.

Авыл мәдәният йортының бик иске хәлдә булганы өчен аны төзекләндереп булмасмы икән дип сорадылар Борындыкта. Бина 1960нчы елда төзелгән булган. Түбәләре, идәннәре шактый таушалган.

Җыенда катнашкан Татарстан Дәүләт Советы депутаты Шакир Ягудин максатларга ирешү һәм нәтиҗәле эшчәнлек өчен халыкның бердәм булуы кирәклеген әйтте. “Җиң сызганып, бергә эшләгәндә генә, уңышы да булачак”, диде ул.

Киләчәккә өмет белән

Иске Чокалы авыл җирлегендәге 230 йортта барысы 664 кеше яши, шуларның 335е хезмәткә яраклы, 231е пенсионерлар, 41 мәктәпкәчә яшьтәге, 57 мәктәп яшендәге балалар.

2014 елда 10 кеше вафат булган, 10 бала туган. Өч никах теркәлгән.

Авыл халкы көче белән төрле эшләр башкарылган: чүп ташлау урыны тәртипкә китерелгән, авыл урамнары, елга тирә-яны җыештыру, куак утырту кебек эшләр башкарылган. Мәдәният йорты каршындагы обелиск янына 45 төп чыршы утыртылган.

Авылның иң төп биналарыннан булган мәктәптә уңайлыклар тудыру уңаеннан шактый эш алып барылган, дренаж үткәрелгән, балалар өчен уен мәйданчыгы ясалган.

Авыл кешесен туендырып торучы сыер, гомумән, терлек башы кимемәве дә биредә яшәүчеләрнең тырышлыгы хакында сөйли. Ике крестьян фермер хуҗалыгы 70ләп авыл кешесен хезмәтле иткән.

Иске Чокалы авылы халкы киләчәккә өмет белән карый. Алар да Бөек Җиңүнең 70 еллыгын каршы алырга әзерләнә, әле юллар ясыйсы, авылны тагын да яшелләндерәсе бар. Соңгыларын дәүләт ярдәменә таянып һәм үзләрендә референдум нигезендә һәрбер йорттагы кеше исәбеннән чыгып, акчалар җыеп башкармакчылар.

Гөлия Фәизова

БАРЛЫК ЯҢАЛЫКЛАРНЫ УКУ