Авыл хуҗалыгы ярминкәләре дәвам итә

Илдәге катлаулы икътисади вәзгыять, азык-төлеккә бәяләрнең кискен артуы казанлылар арасында авыл хуҗалыгы ярминкәләренең популярлыгын бермәбер арттырды. Шуңа күрә республика җитәкчелеге әлеге ярминкәләрне дәвам иттерү карарын кабул итте. Соңгы мәгълүматларга караганда, биредә бәяләр кибетнеке белән чагыштырганда 25 процентка арзанрак икән.

Татарстанда чит ил товарларын үзебезнеке белән алыштыру дәвам итә. Өстәвенә, узган ел азагында республика кибетләрендә азык-төлеккә бәя кискен арта башлады. Бу исә халыкның күпләп авыл хуҗалыгы ярминкәләренә йөрүенә китерде.

Әлеге катлаулы вәзгыятьне исәпкә алып, Авыл хуҗалыгы һәм азык-төлек министрлыгы гадәттә көз айларында оештырыла торган авыл хуҗалыгы ярминкәләрен 2015 елда да дәвам иттерү карарын кабул итте. Бу ярминкәләр һәр шимбә саен июнь аена кадәр уздырылачак.

- Ярминкәләрдә халык өчен аеруча мөһим булган ит, сөт, йомырка, икмәк, он, ярма кебек продуктларны сатып алырга мөмкин. Биредә бәяләр Казанның сәүдә челтәләре белән чагыштырганда 20-25 процентка түбәнрәк, - дип белдергән иде Татарстан авыл хуҗалыгы һәм азык-төлек министрының беренче урынбасары Николай Титов.

Ярминкәләрнең казанлылар өчен ни дәрәҗәдә әһәмиятле булуын Казан шәһәре башлыгы Илсур Метшин да әледән-әле ассызыклап тора.

- Авыл хуҗалыгы ярминкәләренең мөһимлеге артканнан-арта. Шуңа күрә Татарстан җитештерүчеләре бирегә килсен, үз продукциясе белән сату итсен өчен тиешле шартлар булдырырга кирәк, - дип саный шәһәр башлыгы.

Билгеле булганча, ярминкәләр Казанда 7 мәйданчыкта уздырыла. Совет районы халкы Агропромпарк, Дәрвишләр бистәсендә гомер итүчеләр Липатов урамы, ә Авиатөзелеш районында яшәүчеләр исә 123нче санлы һөнәри лицей каршындагы сату-алу урыннарына рәхим итә ала. Ярминкәләр, шулай ук, Яңа Савин базары, Киров районыныдагы “Ягодная слобода” сәүдә үзәге, Мәскәү районындагы “Удача” сәүдә йорты каршында үткәрелә. Вахит районы халкына исә Чехов базарына йөрү мөмкинлеге тудырылган. Күптән түгел авыл хуҗалыгы ярминкәсе уздыру өчен тагын бер өстәмә мәйданчык барлыкка килде. Түбән бәядән азык-төлек сатып алырга теләүчеләр хәзер “Иске шәһәр” префектурасы территориясенә дә (Татарстан һәм Тинчурин урамнары киселешендә) рәхим итә ала.

Әле алай гына да түгел, тиздән Казанда шимбә ярминкәләре саны тагын да артырга мөмкин. Шушы көннәрдә Илсур Метшин башкарма комитет вәкилләренә шундый боерык бирде. Өстәвенә, алар ярминкәләрдәге бәяләрне дә контрольгә алырга тиеш.

- Казан шәһәре башкарма комитеты Авыл хуҗалыгы һәм азык-төлек министрлыгы белән берлектә ярминкәләрдә сатыла торган товар бәяләренә билгеле бер чик куйды. Алар шәһәр базарларындагы бәяләр белән чагыштырганда 10 процентка түбәнрәк. Ә гипермаркетларныкына караганда бәяләр тагын да арзанрак, - дип ассызыклады Казан башкарма комитеты җитәкчесенең икътисади үсеш буенча урынбасары Иван Кузнецов.

Мәсәлән, узган атнада авыл хуҗалыгы ярминкәләрендә тавык итенең бер килограммы 110 сум торган. Шәһәр базарларында исә бу бәя 125 сум тәшкил итә, ди. Карабодайны – 44 сум (кибетләрдә – 54 сум), сөтнең бер литрын исә 28 сумга (кибетләрдә – 40 сум) сатулары мәгълүм.

Билгеле булганча, авыл хуҗалыгы ярминкәләренең беренче этабы 2014 елның сентябрь-декабрь айларында уздырылган иде. Шушы вакыт эчендә авыл хезмәтчәннәре шәһәр халкына барлыгы 760 миллион сумлык товар сатты. Татарстанлылар 6,2 мең тонна бәрәңге, 3,1 мең тонна яшелчә, 6,5 миллион данә йомырка һәм 348 тонна ярма сатып алган.

 http://intertat.ru