ТР хезмәт һәм социаль яклау министры, Халыкара инвалидлар көне уңаеннан, татарстанлыларга мөрәҗәгать итте

ТР хезмәт, мәшгульлек һәм социаль яклау министры Эльмира Зарипова, бүген билгеләп үтелә торган  Халыкара инвалидлар көне уңаеннан, татарстанлыларга мөрәҗәгать итте.

"Ел саен декабрь башында бөтен дөньяда Халыкара инвалидлар көне билгеләп үтелә. Кеше хокукларын тулысынча үтәү  максатыннан чыгып игълан ителгән бу дата мөмкинлекләре чикле кешеләр өчен генә түгел, җәмгыять өчен дә үтә мөһим. Ул инвалидлар проблемаларына тагын бер кат күз салу, аларны чишү юлларын эзләү һәм табу, безнең белән янәшәдә аеруча игътибарга мохтаҗ булган кешеләр яшәвен искә төшерергә мөмкинлек бирә.  

Бүген Татарстан Республикасында  мөмкинлекләре чикле 320 меңнән күбрәк кеше яши, шуларның 14,5 меңнән артыгы – инвалид балалар. Аларга тормыш авырлыкларын җиңеп чыгарга, җәмгыятькә җайлашырга, мөмкинлекләрен чынга ашырырга ярдәм итү – безнең бурычыбыз. Соңгы вакытта Татарстанда аеруча ихтыяҗлары булган кешеләргә тормыш итү өчен шартлар тудыру өлкәсендә зур үзгәрешләр күзәтелә. Татарстан Хөкүмәте тарафыннан  инвалидларны борчыган проблемаларны чишү, аларны социаль яклау чаралары, торак, техник тернәкләндерү чаралары, дәвалау препаратлары, санатор-курорт дәвалануы белән тәэмин итүгә зур игътибар бирелә. Инвалидларга социаль-медицина хезмәтләре күрсәтү, тернәкләндерү индустриясе булдыру да иң мөһим мәсьәләләрнең берсе булып тора.  

Бүген Татарстан Республикасының инвалидларга социаль хезмәт күрсәтү системасында 102 учреждение исәпләнә. 7 меңнән артык инвалид өлкәннәр һәм балалар өчен тернәкләндерү үзәкләрендә, өлкәннәр һәм инвалидлар өчен интернат-йортларда, психоневрология интернатларында ел саен комплекслы хезмәтләр ала. Социаль җайлашу, функциональ бәйсезлек, хезмәткә сәләтлелекне тергезүгә басым ясалган киң спектрдагы фәнни технологияләр куллану яхшы файда  бирә. Бу уңайдан, 442нче Федераль закон да социаль хезмәт күрсәтү системасын сизелерлек яхшыртуга юнәлтелгән. Ул гамәлгә керү белән, социаль-тернәкләндерү хезмәтләренең сыйфаты  өлкәсендә дә зур үзгәрешләр  булачак.  

Инвалидларның эшли алу мөмкинлеген кайтару, хезмәт базарында конкуренция саклый алуга алшартлар тудыру мөмкинлекләре чикле кешеләрне социальләштерүдә аеруча зур урын алып тора. Аларны эшкә урнаштыруда булышлык итү инвалидның җәмгыятькә интеграциясен күрсәтеп тора торган төп күрсәткечләрнең берсе. Агымдагы елда республиканың мәшгульлек үзәкләре тарафыннан 1,7 мең инвалид эшкә урнаштырылган. Инвалидлыгы булган 500 граждан иҗтимагый эшләрдә ктанашкан. Мәшгульлек хезмәте  органнарына мөрәҗәгать иткән 3,6 мең  инвалидның һәр икенчесе үз планнарын тормышка ашырып, эш урынлы булган. Аннан тыш, социаль яклауга аеруча мохтаҗ булган затларны эшкә урнаштыру өчен квота куела, инвалидлар эшли алсын өчен, шул исәптән коляскада йөрүче инвалидлар өчен дә,  эш урыннарын җиһазлау буенча  эш башкарыла. Мәшгульлек хезмәте органнары инвалидларга һөнәри юнәлеш, белем бирү, яңадан укыту буенча да хезмәтләр күрсәтәләр.  

Инвалидларның иҗтимагый-сәяси, социаль-икътисади һәм мәдәни тормышта һәрьяклап катнашуы республиканың тотрыклы, тигез һәм гадел үсешенең төп шартлары булып тора. Нәкъ менә шуны тирәнтен аңлаганга күрә, Татарстан “Уңайлы мохит” федераль программасын тормышка ашыру буенча өч пилот мәйданының берсе булуга иреште. Дүрт ел дәвамында әлеге программаны тормышка ашыру дәверендә  460 тан артык сәламәтлек саклау, халыкны эш белән тәэмин итү, мәгариф, мәдәният һәм спорт объектлары инвалидлар өчен җайлаштырылды. Бу биналар барысы да инвалидларның иҗтимагый оешмалары вәкилләре катнашында кабул ителгән, чөнки нәкъ менә алар каршылыкларны юк итүдә иң төп белгечләр булып торалар.  

Без алга таба да Татарстанда инвалидлар өчен тернәкләндерү һәм җайлашуның барлык шартлары да тудырылсын, аларны кайгырту, ярдәм, яклау һәм шәфкатьлелек ватандашларыбызның көндәлек кагыйдәсенә әверелсен өчен системалы рәвештә эшләячәкбез.    

Сезгә чын күңелемнән сәламәтлек, рух күтәренкелеге теләп калам. Гомерегез буена якыннарыгыз, туганнарыгызның җылысын, назын, игътибарын тоеп яшәгез!" - диелгән мөрәҗәгатьтә.

http://tatar-inform.ru