Сәламәт яшәргә ГТО өйрәтәчәк

Мәктәп укучылары һәм студентлар хәзер үз белем дәрәҗәсен генә түгел, хезмәткә һәм оборонага әзерлеген дә күрсәтергә тиеш. Совет чорында гамәлдә булган ГТО (Готов к Труду и Обороне) нормаларын тапшыру быелдан кире кайтарылды. Әлегә илебездә бу эксперимент сыйфатын гына йөртә. Әмма Татарстан, гадәттәгечә, һәр яңалыкны беренчеләрдән сынарга күнеккән. Республикабыз бу юлы да ГТО нормалары иң беренчеләрдән кертелгән 11 төбәк исемлегендә.

Быелның язында Россия Президенты Владимир Путин совет чорындагы ГТО нормативлары комплексын хәзерге шартларга кайтару башлангычы белән чыкты. Россиядә ГТО нормативларын сынап карау төбәкләре арасында, әйткәнебезчә, безнең республика да бар. Быелгы уку елыннан ГТО комплексы мәгариф учреждениеләренә кертелә башлый

Беренче булып җитәкчеләребез ГТО нормативларын үтәп, халыкка үрнәк күрсәтте. Татарстан Президенты Рөстәм Миңнеханов һәм Казан мэры Илсур Метшин винтовкадан атып һәм отжимание ясап, үзенә күрә флешмоб башлап җибәрә. Яңа башлангычның асылы шунда - ГТО нормаларын тапшырган кеше үзенең танышына эстафетаны тапшыра. Әгәр дә ул кеше эстафетаны кабул итми икән «Подари жизнь» фондына акча күчерергә тиеш. Президент һәм мэр эстафета “таягын” Россия финанс министры Антон Силуанов, Владивосток мэры Игорь Пушкарев һәм Россиянең халык артисты Сергей Безруковка тапшырды.

20 сентябрьдән республикабыз мәктәпләрендә һәм югары уку йортларында  укучылар пневматик һәм электрон мылтыктан ату, сикерү, турникта күтәрелү һ.б. бер төркем күнегүләр ясый башлаячак. Гомумән алганда, ГТО нормалары мәктәп укучылары һәм студентларга гына кагылмый. Аларны 6 яшьтән алып 60ка кадәрге бар кеше тапшырырга тиеш.  Әмма барысы да берьюлы түгел дигәндәй – укучылардан башларга, аннан соң аерым муниципаль берәмлекләрне җәлеп итәргә, ә 2017 елдан бөтен халыкны колачларга ниятләнә.

ГТО нормаларын тапшыруның апробациясе республикабызда быелның язында ук булды. Мәктәп яшендәге 700 бала һәм бер төркем студентлар ГТО тапшырды инде. Шуның нигезендә яңа ГТО нормалары расланды. Элеккегеләргә караганда алар бераз йомшарган. Аннары ГТО нормаларын 6 яшьтән үк тапшыра башлау күздә тотылса да, республикабызда икенче сыйныф балаларыннан башларга булганнар. Беренче сыйныф баласына күнегергә кирәк булган яңалыклар болай да күп бит.

Бик күпләр ГТО нормаларын кире кайтаруны бик уңай кабул итте. Күптән кирәк иде инде бу. Хәзер балаларны гына түгел, хәтта күп кенә өлкәннәрне дә телевизор, компьютер каршыннан аерып алып булмый бит. Сәламәтлек турында уйлау бетте. ГТО кертелү белән бигрәк яшь буынның сәламәтлегенә уңай йогынты булыр, дип ышана ГТО тапшырып үскән кешеләр.

ГТО нормалары 11 яшь төркеме өчен билгеләнгән. Өч кыенлык дәрәҗәсе билгеләнгән – нормативларны үтәү дәрәҗәсенә карап алтын, көмеш һәм бронза билгеләр биреләчәк.

Гүзәл НАСЫЙБУЛЛИНА

http://intertat.ru/