Чүпрәле муниципаль районы

2014 елның 8 сентябре, дүшәмбе

6 сентябрьдә Универсиада Авылында “Бердәм Россия” партиясе активы Форумы узды. Республика җитәкчелеге генә түгел, сәламәтлек саклау, белем бирү, спорт, мәдәни өлкәләрдә эшләүчеләр, оешма-предприятие хезмәткәрләре дә бирегә җыелды.

Президиумда Татарстан Президенты, республика Дәүләт Советына депутатлар сайлауларындагы партия исемлеге лидеры Рөстәм Миңнеханов, “Бердәм Россия” партиясе сәркатибе Фәрит Мөхәммәтшин, Казан мэры Илсур Метшин, 102 гимназия директоры, депутатлыкка кандидат Ирина Бакова утырды.

Чара уза торган залда меңнән артык кеше җыелган. Ул “Бердәм Россия” партиясе активистлары гына түгел, ә, гомумән, башкала тормышында актив катнашучы кешеләр.

63 "футбол кырын" ремонтлаганнар

Илсур Метшин, үз чыгышында, сайлау алды кампаниясенең мөһим булуын билгеләп узды. Эшне ахыргача җиренә җиткереп башкарырга кирәклеген дә искәртте.

Аннан соң Казан мэры биш ел эчендә ирешелгән уңышларны саный башлады. Шушы вакыт аралыгында рәсми рәвештә теркәлгән эшсезләр саны минималь дәрәҗәгә төшсә, җинаятьчелек саны 1,5 тапкырга кимегән. Башкала хуҗасы бюджет сферасында эшләүчеләрнең дә хезмәт хакы артуын да шатланып сөйләде. Социаль ипотека программасы буенча 15 мең гаилә торак алган. Капиталь ремонт программасы нигезендә һәр өченче өйгә яңа сулыш өрелгән. "Бәләкәч" программасына таянып, ничаклы сабыйга балалар бакчасына йөрү мөмкинлеге барлыкка килгән. Хәзерге вакытта әти-әниләр 1 яшь тә 6 айга кадәр булган сабыйларын яслегә урнаштыру буенча да мөрәжәгать итәләр. Киләчәктә бу мәсьәлә дә чишелергә мөмкин.

– Без "Әдәби ишегалды", "Йолдызлы велотөн", "Мәдәни күчеш" чараларын үткәрергә җыенганда, аларның халык арасында шулкадәр популяр буласын уйламадык та. Җәйнең төп бәйрәме 30 августның да хәзер шашлык һәм сыра белән күз алдына китереп булмый, чөнки әлеге көнне бик күп мәдәни чаралар уза, – диде ул.

Аннан сон Казан мэры халык белән "Сорау-жавап" уенын уйнады. Ул 5 ел эчендә эшләнелгән гамәлләр турында залда утыручыларга сораулар яудырды. Тамашачылар жавап кайтарганда, гел санны киметеп әйтте. Чынлыкта исә башкарылган эшләр ике-өч мәртәбә артыграк булып чыкты. Мәсәлән, халык 5 ел эчендә 40ка якын балалар бакчасы төзелде, дип әйтсә, мэр бу санның 88гә җитүен әйтеп салды. Шушы вакыт аралыгында да Казанда барлыгы 106 мең бала аваз салган. Ремонтланган түбәләр мәйданы исә 63 футбол кырына тиң икән!

Ләкин шул ук вакытта кешеләрнең үз сәламәтлегенә салкын каравы мэрны гаҗәпләндергән. Быел диспансеризация узарга тиешлеләрнең бары 30 проценты гына бу эшне төгәлләгән. Паркларда ял итү культурасын югалтуыбызны да ассызыклады ул. Мэр үз чыгышын безнең бердәм бурычыбызны искәртү белән тәмамлады. Ул Казанны үзенә тартып тора торган шәһәр итүдә чагыла. Монда килгән һәр кешенең Казаннан китәсе дә килмәскә тиеш.

“Хрущевкалар турында да онытмаска кирәк”

Чираттагы чыгыш – Дәүләт Советы сайлауларында депутатлыкка кандидат, КДМУ ректоры Алексей Сазоновныкы. Ул исә шәһәр халкы проблемаларын гомумиләштерде.

Күп ишегалларда ремонт эшләре алып барылса да, гомумән алганда, Казан ишегаллары торышы әле һаман сөендерми. Ректор билгеләвенчә, хрущевкаларда, берничә катлы йортларда гомер итүчеләр турында да онытмаска кирәк. Чөнки аларда, гадәттә, өлкән яшьтәгеләр яши. Алар да еш кына “Сез ышандырган капиталь ремонтка кадәр без яши алырбызмы икән?” дип сорый. Чыгыш ясаучы сәламәтлек саклау өлкәсендәге кадрлар кытлыгын да ассызыклап узды. Мехчылар урамындагы яңа гына өйләнешүчеләр паркының да бик начар хәлдә булуын, шәһәр үзәгендә генә түгел, Казан бистәләрендә дә парклар булырга тиешлеген әйтте.

“Без барыбыз да бер команда”

Рөстәм Миңнеханов иң ахырдан чыгыш ясады. Ул, беренче чиратта, халыкның яшәү рәвешен яхшыртуда Казанның 1000 еллыгы программасы һәм 2008 елда Универсиада үткәрү хокукын алу зур этәргеч булды, дип билгеләп үтте.

– Татарстан – Россиядә иң көчле республика. Төбәктә без беренче урында торабыз. Әгәр дә кемдер Татарстанны әрәмтамак дип атый икән, безнең җавап шундый: керемнең бер өлешен үзебез табабыз, – диде Рөстәм Миңнеханов.

Хәзерге вакытта республиканың тормышка ашырыла торган 30 программасы бар. Президент билгеләвенчә, ихтыяҗларны тормышка ашыру өчен икътисад белән җитди итеп шөгыльләнергә кирәк.

Бүген Татарстан республика Россиянең башка төбәк, өлкәләренә караганда яхшырак нәтиҗәләргә ирешүнең сәбәбен Президент килешү һәм тотрыклык булу белән аңлатты:

– Бездә – федераль һәм республиканың муниципаль төзелеше. Моңа өстәп, бизнес бар. Ул Татарстан чәчәк атсын өчен хезмәт куя. Бары тик шушындый система безгә уңышка ирешергә мөмкинлек бирәчәк. Нәрсә ул парламент? Ул – республика хакимиятенең иң мөһим өлеше. Сыерның сөтле булганын сыер үлгәч кенә беләсең. Без кайбер вакытта парламент эшчәнлеген бәяләп бетермибез. Ул югары профессиональ дәрәҗәдә эшли.

Чыгышлардан соң халык сораулар да яңгыратты. Ленин исемендәге мәдәният сараеның бик начар хәлдә булуын, балалар бакчасын төзекләндерү программасына косметик ремонтны, территорияне койма белән әйләндереп алуны өстәргә кирәклеген дә сорап мөрәҗәгать иттеләр.

Рөстәм Миңнеханов киләчәктә дә Татарстан әйдәп бара торган позицияләрен саклап калыр, дип ассызыклады. “Бүгенге төп максат – халык белән эшләү. Без барыбыз да бер көймәдә һәм без – бер команда. Иң мөһиме - халыкның ышанычы”, – диде ул.

Алинә МИННЕВӘЛИЕВА

БАРЛЫК ЯҢАЛЫКЛАРНЫ УКУ

Рөстәм Миңнеханов: “Иң мөһиме – халыкның ышанычы”