Милли моңнар аша мохтаҗларга ярдәм

Узган якшәмбедә Биектау районы Камай авылында зур хәйрия чарасы булып узды. “Иске Казанда милли моңнар” хәйрия концерты үз тирәсенә җыр-моң, татар халык җырларын башкаручыларны һәм шул әсәрләрне яратып тыңлаучыларны җыйды.

Татар журналисты Рөстәм Исхакый проекты буенча оештырылган бәйрәмдә ятимнәр, мохтаҗлар язмышына битараф калмаган җыр осталары милләттәшләребезне бер мәйданга җыйды. Ачык һавада узган татар җыры бәйрәме дуслар җыелуга менә дигән форсат булды. Чарада 500гә якын кеше катнашты, дип хәбәр итә оештыручылар. Алар арасында Россиянең төрле төбәкләреннән “Милләтебез хазинәләре” лагерына җыелган татар балалары да бар иде.

Яңа гына оешкан “Бәхетле дөнья” фонды җитәкчесе Рөстәм Исхакый белдергәнчә: “Милли моңнар” чарасының төп максаты – Татарстандагы тарихи, милләтебезгә кадерле булган урыннар белән якыннан таныштыру һәм шул җирләрне популярлаштыру. “Иске Казан” комплексы нәкъ шундыйлардан санала. Ул республикабызның гаҗәеп гүзәл почмагында урнашкан. Бу тирәдәге гүзәллекне Татарстанда яшәүчеләр үзләре дә белеп бетермәгәндер әле. Тамашачылар арасында концерт карау форсаты белән “Иске Казан” комплексына беренче тапкыр аяк басучылар да булды”. Хәйрия концертыннан кергән керем мохтаҗлар ихтыяҗына тотылачак.

“Иске Казанда милли моңнар” проекты вакытында музей буйлап бай эчтәлекле экскурсия дә оештырылды. Кунакларны Хан чишмәләре белән дә таныштырдылар. Оештыручылар хәбәр иткәнчә, әлеге изге эш дәвамлы булачак.

http://intertat.ru/