Урып-җыюны тәмамлау вакыты билгеләнде

Бүгенге көндә урып-җыю эшләре республикабызда 40 процент башкарылган. Белүебезчә, үсентеләргә дым иң кирәк чакта яңгырларның яумавы республикабызны ашлыксыз калдырырга мөмкин дигән куркулар да булган иде.  Әмма, сөенечкә, иң начар фаразлар чынга ашмады. Быел рекордлы уңыш көтелмәсә дә, 3,1-3,2 миллион тонна бөртеклеләр җыярга ниятлиләр. Хәзерге вакытта уңыш 1 гектардан 22,5 центнер тәшкил итә.

Урып-җыю эшләре быел 5 климатик зонага бүленеп башкарыла. Кайдадыр бу эшләргә алдарак, кайдадыр соңрак керешкәннәр. Беренчеләр рәтендә җиң сызганган Апас, Кайбыч, Буа, Әлки, Нурлат районнарында ашлык инде 50-60 процент мәйданда сугылган. Югалтулар булдырмау һәм тиешле күләмдә уңыш җыю өчен билгеле бер план да бар. Һәр хуҗалык тәүлегенә 4 процент урып-җыю мәйданында эшне төгәлләргә тиеш.

Баштарак быелгы кыр эшләрен республика көненә тәмамларга ниятләнгән иде. Әмма табигать һәрвакыт планнарга берникадәр үзгәрешләр кертә. Республикабыз территориясендә явып узган локаль яңгырлар урып-җыю темпларын аз гына киметкән. Татарстан Авыл хуҗалыгы һәм азык-төлек министрының беренче урынбасары Николай Титов сүзләренчә, быел республикабыз урып-җыюны 5 сентябрьгә башкарып чыгарга сәләтле.

Терлекчелеккә зур игътибар биргән республика буларак, малларны азык-төлек белән тәэмин итү мәсьәләләре дә борчуга салган иде. Әмма инде бүген бу мәсьәләдә дә хафаланырга урын юк дип икеләнмичә әйтергә була. Әзерләнгән азык күләме узган ел күрсәткечләреннән дә күбрәк инде. Печән, сенаж һәм силос тупланмалары буенча беренче урыннарда Саба, Мамадыш, Кукмара, Әгерҗе районнары тора. Эш әкрен барган районнар да бар. Менделеевски, Бөгелмә, Югары Ослан, Яшел Үзән районнарына бу эшкә җитдирәк карарга тәкъдим ителде.

 

Гүзәл НАСЫЙБУЛЛИНА

http://intertat.ru/