Чүпрәле муниципаль районы

Иске Казанда хәйрия концерты

2014 елның 12 августы, сишәмбе

Танылган коллегабыз Рөстәм Исхакый хәйриячелек белән шөгыльләнә башлаган. Бу изге гамәлгә аны ятим балалар язмышы этәргән. Соңгы араларда аңа мохтаҗлар хөрмәтенә оештырган чараларда еш катнашырга туры килгән.

Шул чаралардан соң ул “Бәхетле дөнья” дигән фонд оештырып җибәргән. Инде журналистыбыз зур проектларын республика күләмендә дә таныта башлады. “Туган авыл” комплексында узган журналистлар очрашуында ул 17 августта узачак “Иске Казанда милли моңнар” хәйрия концерты булачагы турында хәбәр итте.

Хәйрия чарасында 25ләп татар җырчылары катнашырга теләк белдергән. Алар арасында халык артистлары Искәндәр Биктаһиров, Зөһрә Сәхәбиева, Рафаэль Сәхәбиевлардан башлап яшь талантларыбыз Филүс Каһиров, Айрат Имашев, Эльмира Кәлимуллина һ.б. бар.

– Хәйрия проектларында катнашу – ул үзе бер бәхет. Андый чаралардан җан тынычлыгы аласың. Рөстәм концертта катнашырга тәкъдим ясау белән, бик теләп ризалаштым. Минем уйлавымча, без – татар җырчылары – андый чараларда еш катнашырга тиеш. Ятим-мохтаҗларга ярдәм итү изге гамәлләрдән санала бит, –ди җырчы Илшат Вәлиев.

Исеменнән үк күренгәнчә, хәйрия концертында халкыбызның моңлы һәм озын көйләрен башкаручы җырчылар гына катнаша. Чарага килүчеләрне концерттан тыш музей буйлап бай эчтәлекле экскурсия, хан чишмәләре белән таныштыру көтә. “Иске Казан” музей тыюлыгына килгән һәрбер кунак Идел Болгары, Алтын Урда һәм Казан ханлыгы чоры һәйкәлләрен үз күзләре белән күрә алачак.

Проект авторы Рөстәм Исхакый белдергәнчә,“Милли моңнар” чарасының төп максаты – Татарстандагы тарихи, милләтебезгә кадерле булган урыннар белән якыннан таныштыру һәм шул җирләрне популярлаштыру. “Иске Казан” комплексы нәкъ шундыйлардан санала. Ул республикабызның гаҗәеп гүзәл почмагында урнашкан. Бу тирәдәге гүзәллекне Татарстанда яшәүчеләр үзләре дә белеп бетерми.

– Биредәге корылмалар, чишмәләр – “Милли моңнар” бәйрәмен уздырырга менә дигән урын. Журналист буларак мине һәрвакыт артистлар иҗаты һәм мохтаҗ балалар язмышы кызыксындырып торды. Сөйләнү бер нәрсә, ә инде ниндидер конкрет гамәлләр дә башкарасы килү теләге мине “Бәхетле дөнья” хәйрия фонды оештырырга этәргеч бирде, – ди Исхакый.

“Иске Казанда милли моңнар” хәйрия акциясе оештыруда шулай ук “Ярдәм” милли ислам хәйрия фонды да булышлык күрсәтә. Концерт чарасыннан кергән акчалар “Ярдәм” мәчетендә күрмәүче һәм ДЦПлы инвалидларны тернәкләндерүгә тотылачак.

Биектау районы Камай авылында 17 август көнне 17.00 сәгатьтә узачак бәйрәмгә билет алып Сез дә бу изге гамәлгә үз өлешегезне кертә аласыз.

Билет бәяләре 300-400 сум тора. Казаннан бару өчен автобуслар да каралган, ди чараны оештыручылар. Тулырак мәгълүматны 89172220565 телефоны аша алырга мөмкин.

Мөршидә КЫЯМОВА

БАРЛЫК ЯҢАЛЫКЛАРНЫ УКУ