173 милләт вәкилен бар Татарстанга таныт

“Безнең республика: яратабыз һәм горурланабыз!” конкурсы үз чикләрен киңәйтә. Бүген Татарстан Халыклары ассамблеясы һәм Халыклар дуслыгы йорты аңа үз стартын бирде.

 

 

Бер атна дәвамында социаль челтәрләрдә #наша республика хэштегы астында чыга торган фотолар өчен “Безнең республика: яратабыз һәм горурланабыз!” дигән конкурс бара. Аны “Команда 2013” һәм “Кадрлар резервы” волонтерлары башлап җибәргән иде. Әлеге идея яшьләрдә киң яңгыраш тапкан. Бер атна эчендә Instagram челтәрендә шушы конкурска дип 800дән артык фото урнаштырылган.

 

- Без - үз республикабызның патриотлары. Татарстан халыклары ассамблеясы үз эченә 35 милли-мәдәни берләшмәне ала. 2010 елдагы халык исәбен алу мәгълүматлары буенча, республикада 173 милләт вәкиле яши. Кызганыч, без аларның барысын да Халыклар дуслыгы йортында чагылдыра алмыйбыз. Шуңа күрә “Безнең республика: яратабыз һәм горурланабыз!” кысаларында “Милләтләр йөзе” (“Лица нации”) дигән үз конкурсыбызны игълан итәбез. Анда без Татарстанда яшәүче барлык милләт вәкилләрен күрергә телибез. Максатыбыз - әлеге конкурсны һәркемгә аңлаешлы итү. Әйдәгез, бер-беребезне тагын да яхшырак белик, 173 милләт вәкилләрен дә камера объективы аша күрсәтик, - диде Халыклар дуслыгы йорты директоры Ирек Шәрипов.

 

 

 

Татарстан Рәссамнар берлеге вәкилләре, милли-мәдәни берләшмә рәисләре дә оештыручылар белән бик теләп хезмәттәшлек итәргә ризалашкан. Фотоларны профессиональ яктан да, һәвәскәрлек ягыннан да бәялиячәкләр.

 

Төрле сыйфат һәм форматтагы фотографияләрне fototatarstan@mail.ru һәм Instagram социаль челтәренә җибәреп була. Иҗади эшләр бик гадел итеп бәяләнәчәк, дип ышандыра оештыручылар. Алар балалар, гаиләләрнең милли киемнәрдән төшкән фотоларын җибәрергә тәкъдим итә. Бәйгегә иҗади эшне юллаганда, фото героеның нинди милләт вәкиленнән булуын язып җибәрү зарур. Instagram социаль челтәренә урнаштырганда аны #нашареспублика#лицанации дигән хештег белән куярга кирәк.

 

Конкурсның нәтиҗәләре 25 августта билгеле булачак. Республика көнендә төп җиңүчегә профессиональ фотоаппарат тапшыралачак. Шулай ук кызыксындыру бүләкләре да көтелә. Иң яхшы фотолар Республика көне уза торган мәйдандагы “Безнең республика: күпмилләтле Татарстан” күргәзмәсендә урын алачак.

 

 

 

Конкурсның ачылышында Кырым Республикасыннан килгән вәкилләр дә катнашты.

 

- Безнең килүебезнең максаты - Татарстан, монда яшәүче халык белән танышу. Шулай ук үзебезне дә күрсәтергә телибез. Иртәгә Биләргә “Сәләт” яшьләр форумына барабыз. Шушы ике көн эчендә бөтен Казанны карадык һәм таң калдык. Бик күркәм шәһәр! Моңа кадәр Анталия һәм Истанбулда булганым бар иде. Алар минем өчен үрнәк шәһәрләр булып торды. Казанны күргәч, “Юк, әлбәттә, Казан - чибәркәй”, дип әйтеп салдым, - Кырым инженер-педагогик университетының мәктәпкәчә белем бирү кафедрасы мөдире Элеонора Бахича үз хис-кичерешләре белән шулай дип бүлеште.

 

Кырым кунаклары киләчәктә Татарстан белән уртак проектларны үстерүне билгеләгән. Симферопольгә кайту белән, актив эшчәнлек башлап җибәрербез, кайбер проектлар белән алмашырбыз, дип ышана алар.

 

 

Алинә МИННЕВӘЛИЕВА

 

http://intertat.ru/tt/