Чүпрәле муниципаль районы

“Халык контроле” порталы эшчәнлеге нинди нәтиҗәләр биргән?

2014 елның 15 июле, сишәмбе

2012 елда үз эшен башлап җибәргән “Халык контроле” дәүләт мәгълүмат системасы нәтиҗәле генә эшләп килә. Халык үзен борчыган сорау буенча шикаятьне нәкъ менә әлеге системада терки. Аннары исә шикаять җаваплы кешеләргә тапшырыла.

Быелның алты аенда системада 11431 шикаять теркәлеп, шуның яртысыннан күбрәге хәл ителгән. Проблеманы чишәргә мөмкинлек булмаса, ул “планлаштырылган” дигән билге белән аерылып куела. Андый шикаятьләрнең саны 3239га җиткән. Димәк, якын киләчәктә шулкадәр мәсьәләне хәл итеп бетерергә тиешләр. Ә дәлилләр китерелеп, проблеманы бөтенләй дә чишеп булмаса, ул “нигезләнгән кире кагу” дигән билге белән теркәлә. Хәзерге вакытта шундый 1178 шикаять теркәлгән.

Җитәкчеләр әйтүенчә, “Халык контроле”нә килгән шикаятьләр муниципаль берәмлекләргә тапшырыла, аларның һәрберсе буенча эш алып барыла. Әлеге мәсьәләләр район башлыгы дәрәҗәсендә чишелә. Шикаятьләрне хәл итүдә иң төп нигез булып аларны үз вакытында чишәргә алыну да тора.

Татарстанның һәрбер районында шикаятьләрне вакытында карап баралар. Бу модераторларның һәм мәсьәләне хәл итү өчен җаваплы кешеләрнең шикаятьләрне көн саен тикшереп торуына да бәйле.

Иң күп шикаять белдерелә торган муниципаль берәмлекләр арасында Казан беренче урынны алып тора. Хәл ителгән шикаятьләр арасында Казан, Чаллы шәһәрләрен, Әлмәт, Түбән Кама, Бөгелмә, Лениногорск, Кукмара, Яшел Үзән, Норлат, Биектау, Лаеш, Чистай шәһәрләрен күрергә мөмкин. Рейтингны Апас, Минзәлә, Кама Тамагы, Актаныш, Мамадыш муниципаль районнары төгәлли.

Җитәрлек дәлилләре булмаган килеш тә кайбер районнар халык шикаятьләренә “нигезләнгән кире кагу” дигән билге тагып, аларны чишүдән баш тарта яки аны үтәүне озак вакытка кичектерә. Шуңа күрә 10 көн эчендә хәл ителергә тиешле мәсьәләләр айлар, хәтта елларга да сузыла. Мондый очракта шикаятьләр хәл ителер өчен җаваплы кешеләргә кире кайтарыла. Мәсәлән, быелның алты аенда андый шикаятьләрнең саны 1400гә җиткән.

Һәр кварталның күрсәткечләрен үтәмәүчеләргә дисциплинар җаваплылык чаралары кулланыла. Бәлки киләчәктә андый кешеләр турында мәгълүмат “Халык контроле” системасында да урын алыр. Моннан кала, шикаятьләрне карау, хәл ителү сыйфаты тикшерелеп тора, Татарстан районнарында күчмә киңәшмәләр дә уздырыла. Соңгы атнада гына республиканың Кеше хокуклары буенча вәкил аппараты Алексеевск, Әлмәт, Лаеш, Спас муниципаль районнарында булып кайткан.

Халык шикаятьләрне үтәү вакыты озакка сузылганы өчен дә ризасызлык белдерә. Быелның май аенда бер кеше Лаеш районының Зеленый Бор бистәсендәге яр пычрак хәлдә дигән шикаять белән чыга. Тик башкаручы органнар бу мәсьәләне хәл итүне август ахырына гына билгели. Әлеге кеше ризасызлык белдергәч, яр буен чистарту эшләре 3 июльгә төгәлләнә. Лаеш районы башкарма комитеты белдергәнчә, хәзер әлеге территорияне даими рәвештә карап торалар.

Чаллы шәһәренең Сөембикә проспектындагы уң як борылышны күрсәтә торган светофор сигналын 2012 елдан бирле һаман “эшләтә алмыйлар”. Шәһәрнең башкарма комитеты эшне төгәлләү вакытын быелның 1 сентябре дип билгеләсә дә, мәсьәлә әле һаман хәл ителергә алынмаган.

Казанлылар исә үз ишегалдыларының бик начар хәлдә булуына зарлана. Мәсәлән, Кызыл Позиция, Гафур Коләхмәтов урамнары буенча шундый шикаятьләр уңай рәвештә хәл ителгән.

Алинә МИННЕВӘЛИЕВА

http://intertat.ru/

БАРЛЫК ЯҢАЛЫКЛАРНЫ УКУ