Начар күрүче балалар фестивальгә җыела

17 апрельдә Казанда начар күрүче балалар иҗатына багышланган “Бармак очларында дөнья” исемле I Идел буе төбәк фестиваленең зур Гала-концерты узачак. “Балачак шатлыгы” хәйрия фонды тарафыннан мондый фестиваль Татарстанда инде икенче тапкыр оештырыла. Узган ел ул республика күләмендә үткәрелгән иде.

– 2013 елдагы тәүге фестивальдә Татарстанның начар күрүче балалар өчен махсус коррекция мәктәпләрендә белем алучы бик күп укучы үзенең җыр-биюдә осталыгын күрсәтте. Быел без фестивальнең географиясен киңәйтергә булдык. Шулай итеп, Идел буенда урнашкан төбәкләрдәге балаларга да катнашырга тәкъдим иттек. Казанга килергә теләүчеләр шуның кадәр күп иде, нәтиҗәдә, безгә һәр төбәкнең командасындагы катнашучылар санын ун кешедән арттырмаска туры килде. “Ак Барс” Яшьләр үзәге сәхнәсендә оештырылачак Гала-концертта 14 төбәктән барлыгы 140 бала чыгыш ясаячак, – дип хәбәр итә “Балачак шатлыгы” фонды директоры Гүзәл Садыйкова.

Фестивальнең режиссеры Марианна Герасимова сөйләгәнчә, быелгы фестивальнең иҗади программасын “Минем йортым – Россия” дип атарга мөмкин. Чөнки балалар әзерләгән чыгышларның күпчелеге Ватанга мәхәббәт, туган илгә тугрылык һәм батырлык темаларына багышлана. Гала-концертта яңгыраган иң матур номерларга кыйммәтле бүләкләр тапшырылачак. Балаларның иҗаты барлыгы җиде номинациядә бәяләнәчәк, алар – “Иң яхшы инструменталь төркем”, “Иң яхшы инструменталь чыгыш”, “Вокал”, “Иң яхшы вокаль ансамбль”, “Иң яхшы сәнгатьле сөйләм” һәм “Иң яхшы бию коллективы”. Балалар арасында өлкәннәр кебек җитди фикер йөртеп, уйларын шигырь юлларына салучылар да шактый: яшь шагыйрьләр “Иң яхшы автор” номинациясендә билгеләнәчәк.

Казанга фестивальгә җыелган балаларны төрле кызыклы чаралар да көтә. Аларга шәһәрнең тарихи урыннарына сәяхәт, күренекле затлар белән очрашулар вәгъдә ителә.

Гүзәл Садыкова сүзләренчә, фестивальне оештыруга “МТС” компаниясенең Идел буе бүлеге, “ИТ–Парк” оешмасы һәм Казанның “Фестиваль” рестораны химая ярдәме күрсәткән. “МТС” компаниясенең Идел буе бүлеге матбугат сәркатибе Екатерина Гаврилова, мәсәлән, “Бармак очларында дөнья” фестивалендә катнашкан балалар быел июнь азагында Казанда Россиянең танылган артисты Константин Хабенский тарафыннан сәхнәләштергән “Маугли буыны” мюзиклы премьерасына чакырылачагына ышандыра.

Лилия ГАДЕЛШИНА  .

Intertat.ru