Өлкәннәр көнендә Чүпрәле районында Владимир Митрофановны 90 яшьлек юбилее белән котладылар
Юбилей Владимир Николаевич өчен чын бәйрәмгә әверелде, аңа күңел күтәренкелеге һәм яхшы кәеф бүләк итте.
2025 елның 1 октябрендә Кече Аксу авылында яшәүче Владимир Николаевич Митрофанов 90 яшьлек юбилеен билгеләп үтте. Бу уңайдан тантаналы чара җылы, гаилә шартларында узды.
Владимир Николаевич илебез тарихындагы күп кенә мөһим вакыйгаларның шаһиты һәм катнашучысы булып тора. Ул сугыш алдыннан туган һәм балачактан ук хезмәткә өйрәтелгән. Әти-әнисез калгач, ул абыйсы һәм апасы белән бергә апасы тәрбиясендә үскән. Башлангыч белем алгач, Владимир Николаевич өч ел армиядә хезмәт итә, шуннан соң бөтен гомерен туган колхозында һәм төзелеш тармагында эшләүгә багышлый, балта остасы булып эшли.
Хатыны Вера Ильинична белән бергә алар, алты бала тәрбияләп, озын һәм бәхетле гомер кичерәләр. Өч баласын югалтуга карамастан, Владимир Николаевич көчен һәм тормышка мәхәббәтен саклап кала. Бүген аның Ульяновск шәһәрендә һәм авылда яшәүче балалары әтисен оныклары Һәм оныкчыклары белән сөендереп, аның өчен терәк булып торалар. 23 ел элек хатыны вафат булганнан соң, юбиляр улы Николай, аның хатыны Алена һәм оныклары белән яши.
Олы яшькә җитеп, Владимир Николаевич уңай һәм игелекле кеше булып кала, зур гаиләсенең тормышы һәм уңышлары белән кызыксынуын саклый.
Юбилярны истәлекле дата белән котларга Чүпрәле районы башлыгы урынбасары Алексей Ярухин һәм авыл җирлеге секретаре Нәргизә Блохина килде. Кунаклар Владимир Николаевичка сугыш һәм сугыштан соңгы еллардагы хезмәте өчен чын күңелдән рәхмәт белдерделәр, Чүпрәле районы Башлыгы Марат Гафаровның җылы теләкләрен һәм котлау хатын, шулай ук истәлекле бүләкләр тапшырдылар.
Юбилей Владимир Николаевич өчен чын бәйрәмгә әверелде, аңа күңел күтәренкелеге һәм яхшы кәеф бүләк итте.