Казанда “Өченче яшь!” XV республика пенсионерлар Спартакиадасы узды
3 июньдә Казан шәһәренең “КАИ-Олимп” мәдәни-спорт комплексы базасында Совет халкының 1941-1945 еллардагы Бөек Ватан сугышында Җиңүенең 80 еллыгына һәм Ватанны саклаучылар елына багышланган “Өченче яшь” XV республика пенсионерлар Спартакиадасы узды. Ярышлар башланыр алдыннан тантаналы шартларда оештыручылар һәм кунаклар спартакиадада катнашучыларны җылы сәламләделәр һәм ярышларда уңышлар теләделәр.
Төп ярышлар башланыр алдыннан программага катнаш эстафета кертелгән иде.
Әлеге спартакиадада Чүпрәле районы данын район этабында иң яхшы нәтиҗәләр күрсәткән ун кешедән торган команда яклады.
1000 метрга йөгерүдә Николай Хрисанов һәм Илсөяр Хәйертдинова, өстәл теннисы буенча — Геннадий Карсаков һәм Валентина Кузнецова, йөзү буенча — Борис Юдин һәм Фиразия Мөхәмәтҗанова, ядрә белән ату буенча — Ринат Рәкыйпов һәм Клара Чернова, дартс буенча — Ринат Рәкыйпов һәм Дилүзә Азизова яхшы нәтиҗәләр күрсәттеләр. Юбилейлы XV республика спартакиадасында Казан шәһәрен дә кертеп, 44 командадан пенсия яшендәге вәкилләр катнашты.
Безнең район командасы әлеге масштаблы чараның барлык эстафеталарында һәм ярышларында катнашу нәтиҗәләре буенча беренче унлыкка керде.
Республика спартакиадасында катнашучылар район Башлыгы Марат Гафаровка, район пенсионерлар берлеге рәисе Дилүзә Азизовага һәм спорт, яшьләр һәм туризм бүлеге җитәкчесе Руслан Вилдановка республикага бару һәм анда катнашу өчен ярдәм иткәннәре өчен чын күңелдән рәхмәт белдерәләр, ә республика дәрәҗәсендә район данын яклаган спорт ветераннарына ныклы сәламәтлек, уңышлар, гаилә иминлеге телисе килә.
Геннадий Карсаков, Спартакиадада катнашучы, Яңа Әлмәле авылы.