Чүпрәледә җирле үзидарәнең актуаль мәсьәләләре каралды
Киңәшмә Татарстан Республикасы Муниципаль берәмлекләр Советы Рәисе Әгъзам Гобәйдуллин җитәкчелегендә үтте.
Районда республика авыл җирлекләре башлыклары өчен семинар-киңәшмә узды, анда җирле үзидарәнең актуаль мәсьәләләре каралды.
Киңәшмә эшендә, шулай ук, Татарстан Республикасы Рәисе Территорияләр белән эшләү идарәсе башлыгы урынбасары Илдар Ибраһимов, ТР Дәүләт Советының Дәүләт корылышы һәм җирле үзидарә комитеты рәисе Альберт Хәбибуллин, Чүпрәле районы башлыгы Марат Гафаров, җирлек башлыклары катнашты.
Үз чыгышында Әгъзам Гобәйдуллин республикада булачак сайлау кампанияләренең мөһимлеген ассызыклады. Исегезгә төшерәбез, сентябрьдә ТР Рәисен һәм 7,5 меңнән артык муниципаль берәмлек депутатын сайлаулар узачак. Әлеге сайлауларның үзенчәлеге шунда ки, алар беренче тапкыр 2025 елның 20 мартыннан гамәлдә булган яңа Федераль канун кысаларында үткәреләчәк.
«Безнең республика әлеге законны эшләүдә актив катнашты һәм нәтиҗәдә безнең күп кенә тәкъдимнәребез исәпкә алынды. Шуларның иң мөһиме—Татарстанда җирле үзидарәне оештыруның ике дәрәҗәле системасын, ягъни авыл һәм шәһәр җирлекләрен, муниципаль районнарны һәм шәһәр округларын саклап калу», — дип ассызыклады Әгъзам Гобәйдуллин.
Әгъзам Гобәйдуллин белдерүенчә, җирле үзидарә органнары эше өч ел дәвамында махсус хәрби операция шартларында бара. Ул муниципаль берәмлекләр башлыкларына махсус хәрби операцидә катнашучыларга һәм аларның гаилә әгъзаларына һәрьяклап ярдәм күрсәтү буенча оештырылган эшләре өчен рәхмәт белдерде.
Республикасы Муниципаль берәмлекләр советы Рәисе җирлекләрдә булган юл, су, чүп-чар түгү һ.б, һ.б. мәсьәләләрен, кыскасы авыл халкын бүген борчыган проблемаларны күтәрде. Күп кенә программаларның быел да гамәлдә булуын әйтте.
«Авыл җирлекләрендә су белән тәэмин итү проблемаларының бер өлеше үзара салым һәм грантлар программасы кысаларында хәл ителә», — диде Әгъзам Гобәйдуллин.
Киңәшмәдә, шулай ук, торак пунктлар чикләрен кадастр исәбенә кую, гидротехник корылмаларга үзәкләштерелгән хезмәт күрсәтү, төзекләндерү объектлары буенча белешмәләрне исәпкә кую һәм икътисади һәм социаль тикшеренүләр үзәгенә тапшыру, гражданнарның үзара салым программасын гамәлгә ашыру мәсьәләләре күтәрелде.
Соңыннан бүләкләү тантанасы булды, анда «Татарстан Республикасы Муниципаль берәмлекләре советы» Ассоциациясенең Мактау грамоталары һәм Рәхмәт хатлары тапшырылды.