Чүпрәлеләр «Дуслык Парады»на чыкты
Халыклар төрле—Ватан уртак!
Халыклар күп һәм төрле. Әмма аларны уртак бер хис- Россиягә мәхәббәт һәм уртак үткәннәр берләштерә.
Россия көненә багышлап үткәрелгән чарада бу бик ачык чгылды. Бу көнне Үзәк урам буйлап мәдәниятчеләр, милли-мәдәни автономияләр вәкилләре, балалар, иҗтимагый оешмалар хезмәткәрләре сафларга төзелеп атлады. Алар Россиядә яшәүче халыкларның милли киемнәрен кигән иделәр. Шул рәвешле, чүпрәлеләр халыкларның милләтара татулыгын һәм бердәмлеген ассызыклады.
Район башлыгы Марат Гафаров республикада төрле милләт, дин кешеләренең дус яшәүләре өчен барлык шартлар да тудырылганлыгын әйтеп үтте, бәйрәм белән котлады. «Бергә, бердәм булганда — без көчлебез», диде ул.
Паркта төрле милләт җырлары яңгарады, биюләр башкарылды. Бу көнне, шулай ук, районыбызның 30га якын 14 яше тулган яшь гражданы паспортлы да булды. Шулай ук, төрле җыр, иҗат бәйгеләрендә җиңүләр яулаган мәдәният өлкәсе хезмәткәрләре дә Мактау Грамоталары, Рәхмәт Хатларына ия булдылар.
Әйтергә кирәк, парадны Татарстанның Мәдәният министрлыгы, Халыклар дуслыгы йорты, Татарстан Республикасында яшәүче халык вәкилләре ассамблеясе ярдәмендә Татарстан халыклары яшьләр ассамблеясе оештыра. Быел парад «Безнең көч — берлектә» шигаре астында үтте. Беренче тапкыр ул «Халыклар дуслыгы — Россия байлыгы» девизы астында, 2017 елда, үткәрелгән.
Белешмә
Татарстанда бүгенге көндә 175 милләт вәкиле яши. Чүпрәледә дус һәм тату булып, 10нан артык милләт вәкиле гомер кичерә. Алар арасында төп урынны татарлар һәм чувашлар алып тора, шулай ук, руслар, үзбәкләр, башкортлар, молдованнар, белоруслар, чегәннәр, хәтта, чукчалар да бар.