Чүпрәледә медицина хезмәткәрләрен котладылар

Июньнең һәр өченче якшәмбесендә Россиядә кеше тормышын һәм сәламәтлеген кайгыртучы һөнәр ияләрен хөрмәтлиләр

Үткән атнада район мәдәният йорты сәхнәсендә медицина хезмәткәрләре көне уңаеннан тантаналы чара узды.

Әлеге һөнәр ияләренә котлау һәм рәхмәт сүзләре белән район башлыгы Марат Гафаров, район Башкарма комитеты җитәкчесе Рөстәм Мөхәммәтҗанов, Башкарма комитет җитәкчесенең социаль мәсьәләләр буенча урынбасары Айрат Җәлалов, район үзәк хастаханәсенең баш табибы Иосиф Кукушкин, яшьләр эшләре, спорт һәм туризм бүлеге начальнигы Руслан Вильданов, район мәгариф бүлеге начальнигы Газинур Хәлиуллин, «Чүпрәле Рассвет Агро» ширкәте вәкиле, холдингның баш юристы Илмас Әбдриев һәм район үзәк район хастаханәсенең беренчел профсоюз оешмасы рәисе Илфат Җамалетдинов мөрәҗәгать итте.

Чыгыш ясаучылар билгеләп үткәнчә, ак халатлы кешеләр — игелекле һөнәр вәкилләре, әлеге өлкәдә кеше гомерен саклап калу өчен тәүлек буе эшләүче, ярдәмчел, миһербанлы кешеләр генә хезмәт куя ала.

— Буген үзен кешеләр сәламәтлеген саклауга багышлаган хезмәткәрләр көне. Көне-төне сез иңгә-иң куеп кешеләрнең тормышы һәм сәламәтлеге өчен көрәшәсез, кешелеккә хезмәт итәсез. Хезмәтегез өчен рәхмәт,- диде район башлыгы Марат Гафаров.

Бу көнне бер төркем сәламәтлек саклау хезмәткәрләре Грамоталар, Рәхмәт хатлары да алдылар.

Чыгышлар, котлаулар концерт номерлары белән үрелеп барды.