Чүпрәле районында социаль хезмәткәрләрне котладылар
Чүпрәледә 100 дән артык социаль хезмәткәр эшли
2000 елдан башлап, июнь аенда, социаль хезмәткәрләр көне билгеләп үтелә.
Бәйрәм хөрмәтенә район мәдәният йортына социаль өлкәдә эшләүче, авыр ситуацияләрдә кешеләргә ярдәм күрсәтүчеләрне чакырдылар.
Алар аз керемле кешеләргә, ятимнәргә, ялгызларга, физик мөмкинлекләре чикләнгәннәргә ярдәм күрсәтәләр.
Район башлыгы Марат Гафаров, социаль хезмәткәрләргә чын күңелдән рәхмәт белдерде:
— Китаплардан, лекцияләрдән өйрәнеп булмый торган һөнәр бар. Социаль хезмәткәр вазифасы да нәкъ менә шундый. Социаль хезмәткәр — ул күбрәк күңел җылысы, җылы йөрәк, ярдәмчеллек һәм шәфкатьлелек кебек сыйфатларга ия булган кеше. Сезгә сокланабыз, яхшылык эшләгәнегез өчен рәхмәт белдерәбез, — диде район башлыгы.
Бу көнне сәхнә түреннән социаль хезмәткәрләргә карата җылы сүзләр яңгырады. Район Башкарма комитеты җитәкчесе Рөстәм Мөхәммәтҗанов, Башкарма комитет җитәкчесенең социаль мәсьәләләр буенча урынбасары Айрат Җәлалов, Татарстан Республикасы Хезмәт, халыкны эш белән тәэмин итү һәм социаль яклау министрлыгының Чүпрәле муниципаль районындагы социаль яклау бүлеге начальнигы Лилия Рәкыйпова, "Чүпрәле үзәк район хастаханәсе«нең халыкка хезмәт күрсәтү буенча баш табиб урынбасары Виталий Тяхин, ветераннарның район советы рәисе Роза Насыйбуллина, тармак ветераны, гомеренең озак елларын социаль өлкәдә эшләүгә багышлаган Зөлфия Юсупова игелекле хезмәт вәкилләрен, тармак ветераннарын чын күңелдән котладылар, рәхмәт белдерделәр, сәламәтлек, сабырлык, мәрхәмәтлелек теләделәр.
Чара барышында халыкка социаль хезмәт күрсәтү өлкәсендә нәтиҗәле хезмәт куйган һәм зур уңышларга ирешкән хезмәткәрләр Татарстан Республикасы Хезмәт, халыкны эш белән тәэмин итү һәм социаль яклау министрлыгының, район башлыгының, район Башкарма комитетының Рәхмәт хатлары, Мактау грамоталары белән бүләкләнделәр.
Халыкка социаль хезмәт күрсәтү өлкәсендәге казанышлары һәм күпьеллык намуслы хезмәте өчен «Кайгырту» халыкка социаль хезмәт күрсәтү комплекслы үзәгенең өйдә социаль хезмәт күрсәтү бүлеге социаль хезмәткәре Эльмира Вазыйх кызы Вәлиулловага «ТРның атказанган социаль яклау хезмәткәре» дигән мактаулы исем бирелде. Әлеге өлкәдә озак еллар хезмәт куйган ветераннар да хөрмәтләнде.