Белгечләр Чүпрәле районында чәчүлекләрнең сыйфатын тикшерделәр
Махсус комиссия язгы кыр эшләренә йомгак ясады.
Комиссия эшендә районның авыл хуҗалыгы һәм азык-төлек идарәсе башлыгы Тәлгать Хәлитов, кырчылык һәм механизация идарәсе белгечләре, «Россельхозцентр»ның район бүлеге башлыгы Исламетдин Низамов, үсемлекләрне чүп үләннәрдән һәм корткычлардан саклау буенча агроном Илгиз Азизов, хуҗалыклар җитәкчеләре һәм урыннардагы баш агрономнар катнашты.
Комиссия чәчүлекләрне карады һәм язгы кыр эшләренең сыйфатына бәя бирде. Тикшерү «Агро Вест» җаваплылыгы чикләнгән җәмгыяте кырларын, крестьян-фермер хуҗалыкларын караудан башланды, аннары эш «Чынлы», «Чүпрәле Таң Агро» һәм «АгроТрансПорт» ширкәтләрендә дәвам итте.
Районның барлык хуҗалыкларында һәм җәмгыятьләрдә язгы кыр эшләре барлык технологик таләпләрне үтәп башкарылды. Көзге айларда туфракны сыйфатлы эшкәртү, чәчү чараларын вакытында үткәрү, минераль ашламалар кертү, көзге культураларны тукландыру яхшы уңышка ышанычны арттыра.
Бүгенге көндә хуҗалык һәм җәмгыять кырларында корткычларга, авыруларга каршы эшкәртү эшләре алып барыла, шулай ук тукландыру, рәт араларында эшкәртү һәм башка бик күп эшләр башкарыла. Шул ук вакытта чүп үләннәргә һәм корткычларга каршы көрәш дәвам итә.
- Бүген туфракта дым җитәрлек. Хәзер бөтен көчне чәчүлекләрне карап торуга, күпьеллык үләннәрне беренче чабуын оператив рәвештә җыеп алуга юнәлтергә кирәк, - ди Тәлгать Халитов.
Кабул итү йомгаклары буенча чәчүлекләр буенча җиңүчеләр билгеләнәчәк һәм алар Сабантуй мәйданында бүләкләнәчәк.