Чүпрәле районы укучысы ГТО проектларының республика конкурсында җиңү яулады
Яңа Әлмәле урта гомуми белем бирү мәктәбеннән Денис Афиногентов 1941-1945 еллардагы Бөек Ватан сугышында Җиңүнең 80 еллыгына багышланган «Хәтер юллары буйлап» ВФСК ГТО проектларының республика конкурсында җиңүче булды. Бу хакта Татарстан Республикасы Чүпрәле муниципаль районының Яшьләр эшләре, спорт һәм туризм бүлеге хәбәр итә.
Денисны лаеклы җиңүе белән котлыйбыз, укуында һәм спортта алга таба да уңышлар телибез.
Исегезгә төшерәбез, конкурсның муниципаль этабы 2025 елның 28 апреленнән 20 маена кадәр, республика этабы (килгән эшләрне бәяләү, нәтиҗәләр ясау) 2025 елның 20 маеннан 31 маена кадәр барды. Муниципаль этап йомгаклары буенча, һәр муниципаль район конкурсның республика этабында катнашу өчен конкурсның муниципаль этабында җиңүченең бер эшен конкурсның оештыру комитетына тапшырды.
Конкурсның республика этабында 25 муниципаль берәмлектән иң яхшы 25 эш каралды.
Конкурста катнашучыларның эшләре Бөек Ватан сугышы турындагы истәлекне мәңгеләштерүгә, сугыш кырында һәм тылда сугышкан ветераннар һәм Ватанны саклаучылар, якташлар, туганнарыбыз һәм якыннарыбыз турындагы тарихи хәтерне саклауга багышланган Сугышчан дан урыннарын чагылдыра.
Конкурс эшләре рәсемнәр, презентацияләр, видео-хикәяләр буларак тәкъдим ителде. Эшләрне теләсә нинди техникада теләсә нинди рәсем яки график материаллар, компьютерда программалар кулланып иҗат иткәннәр.