50 ел гомерен класс тактасы янында үткәреп зирәк акыл белән 80 яшен тутырган математика укытучысы Зоя Абязова күркәм юбилеен билгеләп үтте
80 яшен тутырган көнне ул илнең төрле почмакларыннан – укучыларыннан бик күп рәхмәт сүзләре кабул итте.
Кайбер һөнәрләр белән без сирәк очрашабыз, икенчеләре турында ишетеп кенә беләбез. Ләкин бер генә буын да аннан башка яшәми - ул укытучы. Ул безне балачак һәм яшьлек аша алып бара, белемен бирә, һәр балага күңелен сала һәм үз юлын табарга ярдәм итә. Бөек бәхет — фәннәргә генә түгел, яхшылыкка, гаделлеккә, кешелеклелеккә дә өйрәтүче педагогны очрату.
Зоя Васильевна Абязова-нәкъ менә шундый укытучы. 50 ел гомерен ул мәктәпкә багышлый, йөзләгән укучы өчен математика укытучысы гына түгел, ә акыллы остаз да була. 80 яшьлек юбилее алдыннан аның белән очрашкач, без аңардан ихлас сүзләр ишеттек:«Әгәр тормыш кабатланса, мин бу һөнәрне яңадан сайлар идем».
Аның юлы кечкенә генә поселокта башлана, анда ул бик иртә әтисез кала. Гаиләсе Иске Чүпрәле авылына күченеп килә һәм урта белемне Зоя Васильевна Иске Чүпрәле урта мәктәбендә ала. Мәктәптә ул һәрвакыт үрнәк һәм алдынгы укучы була. Бу хакта безгә аның сыйныфташы, якын дусты һәм гомерлек хезмәттәше Клара Насретдинова сөйләде.
- Ул һәрвакыт актив иде, хәтта чирәм җирләрне үзләштерүчеләр сафында да булырга теләде, әмма язмыш ихтыяры аны мәктәп белән бәйөләде.
Алар мәктәпнене тәмамлаган чода – 60 нчы елларда – республикада районнарны берләштерү процессы башланган иде. Чүпрәле Буа районына кушыла. Кадрлар, җитмәү яшьләр арасыннан белгечләр эзләүгә этәрде. Көмеш медаль белән мәктәпне тәмамлагач, үзен сәләтле укучы буларак күрсәткән Зоя Васильевнаны математика укытырга чакыралар. Шулай итеп, ул 19 яшендә үк мөгаллимә була. Алга таба читтән торып белем ала.
- Зоя Васильевна һәрвакыт зирәк, талантлы, үз һөнәренә гашыйк укытучы булды. Ул балалар белән генә түгел, ата-аналар белән дә эшләде. Һәм бу хезмәттәшлек укытуда да, тәрбиядә дә югары нәтиҗәләр бирде. Аның укучылары җәмгыятьтә уңышлы һәм файдалы кешеләр булды, олы тормышта тиз яраклаштылар һәм хфялларын чынга ашырдылар, — ди аның педагогик хезмәте турында 1 нче санлы Иске Чүпрәле урта мәктәбе директоры Лилия Насыйбуллина.
Зоя Васильевнаның чыгарылыш сыйныф укучылары бик күп, алар бүген яраткан укытучыларына уңышлары белән сөендерәләр.
— Зоя Васильевнаны һәрчак тыныч, барлык укучыларның иң яраткан укытучысы, зыялы шәхес иде, - ди аның укучысы Нәфисә Усманова.
Синең ышанычлы тылың булмаса, үзеңне яраткан эшеңә тулысынча биреп булмый торгандыр. Зоя Васильевна өчен шундый кеше аның коллегасы — физкультура укытучысы Саяр Абязов була. Никахта аларның ике баласы — улы һәм кызы туа, алар юрист һәм бухгалтер хөнәрләренә ия булалар. Кызганычка каршы, Сәяр Абязов 2003 елда вафат була. Бүген әбиләрен дүрт оныгы һәм ике оныкчыгы сөендерә.
Дан һәм байлык өчен түгел, ә йөрәк кушуы буенча сайланган һөнәрләр дә бар. Укытучылар – нәкъ менә шундый кешеләр. Аларның бүләге – счеттагы миллионлы керемнәр белән түгел, ә укучыларының йөрәктән чыккан рәхмәтләре. 50 ел гомерен мәктәпкә багышлаган Зоя Васильевна 80 яшен тутырган көнне укучыларыннан ихлас рәхмәт сүзләрен кабул итте.
Тәбрикләүчеләр арасында мәктәп директоры Лилия Насыйбуллина, аның хезмәттәше Клара Насретдинова, ветераннар советы рәисе Роза Насыйбуллина һәм аның укучысы Нәфисә Усманова да бар иде.
Роза Насыйбуллина очрашу вакытында мәктәп тормышыннан Зоя Васильевна белән бәйле булган иң якты истәлекләр белән уртаклашты, җылы рәхмәт сүзләрен җиткерде.
Кунаклар юбилярга бүләкләр, чәчәкләр тапшырдылар; очрашу чәй өстәле артында дәвам итте.