Чүпрәле районы Башлыгы Марат Гафаровның Җиңү көне белән котлавы
Хөрмәтле чүпрәлеләр, тыл хезмәтчәннәре!
Сезне Бөек Ватан сугышында Җиңү Көне уңаеннан чын күңелдән тәбрик итәм!
Халкыбыз авыр сынаулар аша, тиңдәшсез батырлыклар күрсәтеп, 1418 көнлек озын юл үтеп килгән, фашистлар Германиясен җиңүебезне белдереп күкләргә салютлар атылган тарихи көн — 1945 елның 9 маеннан соң 80 ел узды. Бу вакыт эчендә берничә буын алышуына да карамастан, әлеге тантаналы бәйрәмнең тәэсир көче арта гына бара.
Җиңү зур югалтулар бәрабәренә яуланды. Бөек Ватан сугышының ачы җилләре һәр гаиләгә диярлек кагылып узды, шул фаҗигале дәвер вакыйгалары әле дә һәрберебезнең хәтерендә. Чүпрәледән генә дә 14 мең кеше фронтка китте, шуларның яртысыннан артыгы башын салды.
Халкыбызның корычтай ихтыяры һәм бердәмлеге, фронтовикларның, тыл хезмәтчәннәренең ныклыгы һәм фидакарьлеге нәтиҗәсендә Ватаныбызның азатлыгын саклап калу, кешелекне фашистлар коллыгыннан коткару мөмкин булды. Ветераннарыбыз — Туган илгә мәхәббәт, ватанпәрвәрлек, вөҗданлылык һәм изге максатларга тугрылык кебек гаять кыйммәтле рухи хәзинәләрнең җанлы гәүдәләнеше, безнең өчен күркәм үрнәк.
Махсус хәрби операция барган көннәрдә чүпрәлеләр Россия Федерациясенең күпмилләтле халкы белән бергәләп дәүләтебезнең мәнфәгатьләрен, аның куркынычсызлыгын һәм бәйсезлеген кыюлык һәм батырлык белән саклый, хәрби бурычларын, кайчак хәтта гомерләрен фида кылып, намус белән үти.
Бөек Ватан сугышы ветераннарының нәсел дәвамчылары — хәзерге яшьләребез данлыклы бабаларының иң дәһшәтле чорларда да Туган җиргә тугрылыклы булулары, сынмыйча-сыгылмыйча авырлыкларга каршы торулары ихтирам хисләре тудыра. Совет солдатларының сугыштагы каһарманлыгы, тыл хезмәтчәннәренең Җиңү хакына үз-үзләрен аямыйча тырышып эшләве турында хатирәләрне киләчәктә дә буыннан буынга тапшыра килү бик мөһим.
Хөрмәтле ветераннарыбыз, сугыш чоры балалары-тыл хезмәтчәннәре! Ил өчен барган данлы көрәш елларында күрсәткән батырлыкларыгыз, көчле ихтыярыгыз, тыныч тормыштагы фидакарь хезмәтегез, туган җиргә көчле мәхәббәтегез һәм бүгенге якты тормышыбыз өчен сезгә олуг рәхмәтебезне белдерәбез.
Беркемнең дә, беркайчан да бу дәһшәтле сугыш фаҗигаләрен онытырга хакы юк. Сезгә ихлас күңелдән исәнлек-саулык, күңел күтәренкелеге һәм якыннарыгызның җан җылысын тоеп яшәвегезне телибез. Тормышларыбыз имин, көннәребез якты, күңелләр һәрчак шат булсын.
Марат Гафаров, Чүпрәле муниципаль районы Башлыгы.