Татарстан Республикасы Чүпрәле муниципаль районында Марат Сәлахов истәлегенә мини-футбол буенча турнир узды
Чара Бөек Ватан сугышында Җиңүнең 80 еллыгын бәйрәм итү кысаларында оештырылды.
2025 елның 8 маенда «Алтын» спорт комплексында Марат Сәлахов истәлегенә ир-атлар командалары арасында Бөек Ватан сугышында Җиңүнең 80 еллыгына багышланган мини-футбол буенча ачык район турниры узды.
Чүпрәле муниципаль районы Башкарма комитеты җитәкчесе Рөстәм Мөхәмәтҗанов, яшьләр эшләре, спорт һәм туризм бүлеге җитәкчесе Руслан Вилданов, Марат Сәлаховның кызы Энҗе һәм аның туганы Ринат Сәлахов футболчыларны һәм җанатарларны җылы сәламләделәр, Җиңү көне белән котладылар, командаларга матур һәм гадел уеннар теләделәр.
- Футболчылар бу турнирда ел саен рәхәтләнеп катнашалар. Марат Сәлахов кебек спортчыларны онытмавыгыз өчен рәхмәт сезгә, - диде Рөстәм Мөхәмәтҗанов.
Рөстәм Искәндәр улы шулай ук Марат Сәлаховның кызы Энҗегә истәлекле бүләк тапшырды.
Руслан Вилданов кыскача Марат Сәлаховның данлыклы спорт юлы турында сөйләде. Марат Сәлахов искиткеч спортчы иде. Футбол һәм хоккейны бик шәп уйный иде. Руслан Расих улы шулай ук Чүпрәле яшь футболчыларының авыл районнары арасында Татарстан Республикасы чемпионнары булуларын билгеләп үтте.
Турнирда 8 команда катнашты: Яңа Әлмәле, ДДОЗ, «Сепрел» (Чуаш Чүпрәле), Зур Аксу, «Интернационал» (Иске Чүпрәле), Городище, Ульяновск өлкәсеннән Чеботаевка һәм Уби командалары.
Командалар 2 төркемгә бүленеп, һәр команда бер-берсе белән уйнады, ахырда 1, 2, 3 урыннар өчен финал уеннары үтте. Уеннар көне буе дәвам итте.
Турнир нәтиҗәләре буенча район чемпионы исеменә «Интернационал» командасы лаек булды, «Сепрел» командасы - 2 нче, Яңа Әлмәле командасы 3 нче урынны алды.
Уеннар ахырында шулай ук иң яхшы уенчылар да билгеләнде. “Иң яхшы уенчы һәм һөҗүмче” Адель Сафин булды, “Иң яхшы капкачы” дип Петр Алеев танылды, “Иң яхшы сакчы” - Дмитрий Лянкин.
Призлы 1, 2, 3 урыннарны яулаган барлык командаларга грамоталар, медальләр, акчалата «премияләр» һәм кубоклар, иң яхшы уенчыларга шулай ук грамоталар һәм бүләкләр тапшырылды.
Призерларны һәм иң яхшы уенчыларны Рөстәм Мөхәмәтҗанов һәм Руслан Вилданов бүләкләде.
Футболчылар ярышларның югары дәрәҗәдә оештырылуын һәм уздырылуын билгеләп үттеләр, ел саен Бөек Ватан сугышында Җиңү бәйрәме көннәрендә үткәрелә торган алдагы турнирларда да катнашырга теләк белдерделәр.